State tesem ajaklen nübotok mapa inyaktsü atema sangdonger

Kohima, May 01 (TYO): Tawa Kohima nung tzüngluruwa atema terenemshiba senden ka amendang lemtetba atema May 4, 2019 nü state nung jila aser yimtsüng tesem ajaklen nübotoka mapa inyaktsü atema lemtetba nung ajemdaker Home Department Nagaland State Disaster Management Authority (NSDMA)-i, taruba tzüngluruwa mongpu atema renemshia aser alima lendong balala atema renemshia jila aser yimtsüngtem ajak nung nübodoka inyaktsü metetdaktsüogo.
Nisungi bener aruba lendong balala nokdangtsü atema ajaki shilem tajung agitsüla, ta ketdangsertemi metetdaktsü.
Peipei tesem nung nübodoka inyaktsü atema temetettsütem:
* Kilentzü aodak/culverts nokdanga aliba jangjateta tzü sadem-sadema ayimtsü aser tzümetsüng nokdangtsü atema item tesem merüktettsüla.
* Kilentzü aodak kilem nungi tzü indangindanga yimokba agientsüla.
* Motzü atsüngdena aliba atsütoktsüla.
* Kilentzü aodak jana-ona indoktsüla.
* Department ajaki pei ket nung aliba kiojen kümzüka alitsü atema inyaktsüla aser peipei DDMAs ajanga shilem tajung agitsüla.
* Department of Rural Development-i VDBS ajanga yimtsüngtem nung nübotoka inyaktsü atema ketdangsüa inyaktsüla.
* Coordination aser logistic contingency expenditure atema Home Department-i DDMAs nem sen lakh kaka lemzüktsütsü, aser parnoki hopta ka tsüngda peipei district nung nübotoka inyakba osang den külemi APRs agütsütsüla.