State tesem ajaklen Right to Information Week mongogo

Dimapur, Mongputeni/October 06 (TYO): Mongputeni/October 06, 2018 nü state tesem ajaklen Right to Infromation (RTI) Week mongogo; tanü Wokha DC office Conference Hall nunga RTI Week monga liasü.
Okila jembidang Wokha DC, Dr. Manazir Jeelani Samoon, IAS-i, RTI Act ya sorkar inyakyim teladak akumtsü nükjidong nung lir, aser iba temeden ya junga amshira sorkar inyakyim kanga tajungba akumtsü, ta metetdaktsü.
Paisa, iba ya nüburtemi pei temeden metettsü atema hadir tajung ka lir, ta ashi.
Kasa sentong nung EAC Wokha, Arhomo Yanthan-i power point presentation ajanga iba Act nükjidongtem metetdaktsüdang pai, RTI Act ya sensotemi ketdangsertem inyakyim teladak süa inyakdaktsütsü atema lir, ochimashi malitsü aser senso ajaki osangtsüsang meteta alitsü atema lir, ta ashi.
Tesülen RTI film “My Right, My Voice” sayua liasü.
Dimapur: Tanü linük tesem ajak den liromedema Dimapur district nunga DC Office Conference Hall, Dimapur nung “RTI & the role of citizen” omen nung ajemdaker RTI Week mongogo.
Iba sentong nung jembidang Dimapur Deputy Commissioner, Sushil Kumar Patel, IAS-i iba Act indang metetdaktsü aser office balala nung tekolakpurtem dang pei mapa nendaka ochishia inyaktsü ajungshia liasü.
Sentong nungsa by SDO (C) & APIO Dimapur, Kemciyile Power Point presentation ajanga RTI Act indang metetdaktsü aser RTI indang documentary film tatsü ka sayu.
Iba sentong tenzüka Covenant Baptist Church nung Pastor, Yabang Longkumer-i sarasadem. Iba sentong ya ADC & PIO Dimapur, Albert Ezung leniba nung agia liasü.
Zunheboto: Tanü Zunheboto district nunga “RTI and the role of citizens” omen nung ajemdaker conference hall, DC Office Zunheboto nung RTI Week mongogo.
Iba sentong nung jembidang Zunheboto Deputy Commissioner, Shanavas C, IAS-i, osangtsüsang angutsüji nisung ajak temeden lir, timi amshira RTI ya kanga tajung, RTI ya timi amshitsüla; sorkar nem tetsükdaktsü agutsütsüsa masü saka yaritsüsa iba temeden amshitsüla, ta ashi.
Sentong nungsa SDO (Civil) Sadar, Ajit K. Ranjan, IAS-i power point presentation ajanga RTI indang metetdaktsü aser “My Right, My Voice” film sayaa liasü. Iba sentong nung school aser college tenet nungi kaketshirtem, tesayurtem aser melungtet teloktem aden.
Iba sentong ya PIO & ADC Zunheboto, Vekhoyi Chakhesang leniba nung agi.