State tesem balala nung National Voters’ Day sentong ayonga agiogo

January 25, 2019 nü Dimapur nung Commissioner of Taxes Office indang conference hall nung National Voters’ Day sentong nung Commissioner of Taxes, Kesonyu Yhome, IAS-i jembiba noksa nung angur.

Dimapur, January 25 (TYO): Tanü India linük tesem balala den külemi Nagaland nunga tesem ajungalen 9buba National Voters’ Day anogomong sentong ayongzüka mongogo, ta ketdangsertem osang ajanga metetdaktsü.
Dimapur: Tanü Dimapur district nunga Commissioner of Taxes Office conference hall nung National Voters Day sentong ayongzüka among, aser iba sentong nung tetushi tejaokerji Commissioner of Taxes, Kesonyu Yhome, IAS liasü.
Iba sentong nung jembidang pai, election ketdangsertemi timtem ajurur, ibaji voters tenüng mezüngokba agi masü saka e-roll nung tenüng aika tali inoksemba ajanga lir, ta metetdaktsü.
Iba dak sendakba nung pai ajak dang election dak sendakba nung tim masüba mapatem meinyaki e-roll merüktettsü ayongzük.
Kasa sentong nung Chief Election Commissioner-i yokba osang metetdaktsü aser ADC Dimapur, Albert Ezung-i ketdangsüa Voters Pledge tenangzükba agi.

Mokokchung: Mokokchung district nunga “No Voter to be left Behind” omen nung ajemdaker iba anogomong sentong ya Community Hall, Penli Ward Mokokchung nung ayongzüka agiogo.
Iba sentong nung tetushi tejaoker T. Imlitoshi Walling-i onük jembia lkiasü.
T. Imlitoshi Walling-i lanurtem dang electoral roll nung tenüng züluoktsü aser linük yangerba nung shilem agia democratic inyakyim nung adentsü ayongzüka liasü.
Kasa sentong nung DC & DEO Mokokchung-ia lanurtem dang maongka agia pei vote temeden amshitsü ayongzük.

Civil Secretariat: Tanü Nagaland Civil Secretariat nunga iba anogomong sentong agia NVD tenangzükba agiogo.
Home Commissioner, Ramakrishnan, IAS leniba nung iba sentong agi. Iba sentong nung Secretary, Home Department Rovilatuo Mor, IAS-i onük jembia liasü.

Tuensang: Tanü Tuensang nunga District Election Office nung National Voters Day anogomong sentong ayonga agiogo.
Iba sentong nung District Administrative Officers, DBs aser GBs, yimtenren party tem, kaketshirtem aser voters list nung tang tasen tenüng züluokertem aden.
Iba sentong nung tetushi tejaokerji Chang Khulei Setshang Tir, Nungsanglemba Chang liasü.
Iba sentong nung jembidang Tuensang DC, L. Jamithung Lotha-i election dak sendakba metetpelatsü atema toll free number 1950 indang metetdaktsü.
Sentong nungsa Loyem Memorial College Tuensang kaketshirtemi jilushi ka ajanga tang state nung voters tia metetdakja liasü.
BY M. Chaitanya Prasad IAS ADC & ERO Tuensang leniba nung NVD tenangzükba agi aser Pukha EAC Tuensang-i EVM amshiyim sayua liasü. Tesüsa SDO (C) Tuensang, Ajit Kumar Verma, IAS-i tepela anküp o jembi.

Zunheboto: Tanü Zunheboto District nunga DC Office’s Conference Hall nung National Voter’s Day mongogo.
Iba sentong nung jembidang DC & DEO Zunheboto, Shanavas C, IAS-i election inyakyim balala indang metetdaktsü aser ketdangsertem dang election tesünep nung merüka agitettsü atema nendaka inyaktsü ayongzük.
Paisa EVMs nung NOTA button ji None of the Above (NOTA) lir, koba tetezü nai candidate ka nem danga vote magütsünüra NOTA button nung anemtsü akok, ta ashi.

Kasa sentong nung District Icon, Aghali H Assumi-i iba anogomong omen “No Voters to be left behind” jembia liasü.
Tanü Peren, Phek, Mon, Wokha, Noklak, Medziphema sub-division, Bhandari, Tening, Pfutsero sub division aser Aboi nunga ‘No voters to be left behind’ omen nung ajemdaker iba anogomong sentong ayongzüka agiogo.