State Vigilance Commission Government ozüng agi alena lir

Kohima, July 12 (TYO) : Nagaland nung State Vigilance Commission (SVC)-i tangashiba aser tanguba kija agibo bushisüngdang mapa metenzüktetter, kechiyong government telemtetba nung ajemdaker dang inyaker . Iba maparen nung ‘technical’ tebilemtsü kar lir, anungji ibaji jangjashitsü atema government dangi yokogo ta tanü sangdong ka ajanga SVC-i metetdaktsüogo.
Iba ken o ya tawa ACAUT teloki Dimapur nung gari totzü nung kerosene meyokteper ayoktsü renemba mapatem putetaka SVC-i kecha meinyaker ta aija metetdaktsüba osang ka jangshitsü dang metetdaktsü.
ACAUT telokisa Nagaland nung SVC teloki ochimashi mapatem anema kecha meinyaktetba aija SVC ya government tobur ajungtsü atema enokba teka ka dang lir ta ashiba manganüi, tanü SVC nungi sangdong ka nung akok tashi CVC-ia state nung ochimashi mapatem anema bushisüngdang mapa inyakdagi saka nisung agi meperir aser ano sorkar telemtetbatem agi sadema meinyaktetter ta metetdaktsü.
Tang ya Commissioni case 90 SIT ajanga bushisüngdangdagi, item atemaji ketdangser aika nüngdaker saka tang Commission nung Investigating Officers 13, Assisting Investigating officers 11 aser Director dena Supervising Officers 3 dang lir. Item jagi state ajunga nung inyaker ta CVC sangodong ajangasa metetdaktsü.
Dimapur nung gari totzü den kerosene meyoktepa ayokba maparen putetba ken o ji Dimapur police-i bushisüngdanger asünungji ano tanga telok kati bushisüngdangtsübaji ozüngi memelar, iba jagi ochimashi mapa anema inyaktsübaji ajak khuret süaka SVC teka amuoktsübaji makoker ta parnokisa ashi.
2014 küm Excise department nung atalokba maparen nung bushisüngdang sür külen department nem aibelena alirtem dak tapet temerenshi agütsütsü asoshi metetdaktsüogo aser parnokia yamaji inyakogo ta SVC-isa metetdaktsü.
ACAUT-isa 2015 küm tatidang magii mashilen nungi BDO kar shimba anema Chief Secretary nem ken o agütsüba dak aketba maparen nung ano government-i kecha ‘direction’ agüja mali aser ano Food & Civil Supply department nung ochimashi adokba mapatem indanga kecha ‘complaint’ agüja mali,” ta SVC-isa metetdaktsü.