State Vigilance Commission nung BAS tenzük

Dimapur, Aami (June) 29 (TYO): Aami (June) 28, 2018 nü State Vigilance Commission nung Vigilance Commissioner, Mayang Lima-i Aadhar based Biometric Attendance System (BAS) tenzüktsü.
Iba ya PDA sorkar indang 100 days programme nung shilem ka ama tenzük aser Conference hall nung sentong ka ayongzüka agi.
Sentong nung mendenji Secretary, State Vigilance Commission, Sehjang Doungel liasü.
Sentong nung o jembidang Vigilance Commissioner Mayang Lima-i ketdangser aser staff tem dang, “State Vigilance Commission ya kanga dang akhümket reju ka lir aser nübortemi akhümtsübur, anungji tanga department temi atishia benshitsü atema Biometric Attendance System (BAS) sülen anidaktsü ayongzüker” ta ashi.
BAS tenzükba ajanga mapa inyakertemi mapa tajungba inyaktsü aser attendance inyakyim nung tashishitsü melii inyaktsü imlar, ta paisa shisem.
IT Department-i State Vigilance Commission nung BAS tenzüktsüba atema Mayang-isa parnok dang pelaba metetdaktsü.
Sentong nung Director & DIGP, Vigilance & Anti- Corruption Police, I Meyionen-ia o tatsüka jembidang, Vigilance Commissioner-i mapa agizüker ita ka tsüngda Biometric Attendance System (BAS) tenzükba aser CCTV enokba atema pelaba metetdaktsü.
Meyionen-isa Commission-i timtem kar ajuruba lemsatep aser Vigilance Commissioner-i Commission len ania aotsü imlar, ta ashi.