States, UTs ajaki ghonda 24 tsüngda websites nung FIR upload asütsüla: SC

New Delhi, September 07 (Agencies): Bodhbarnü Supreme Court (SC)-i States aser  Union Territories ajak dang, police station tem nung FIR agütsüba sülen ghonda 24 tsüngda FIRs ajakji parnok indang websites nung upload asütsüla, ta metetdaktsüogo.
Ajisüaka Justices- Dipak Misra aser C Nagappan nati akümba SC bench-i internet connectivity junga maliba state tem atemabo mapangji ghonda 72 tashi latettsüogo.
Ano telungpur rara aser tetsür o tanurtem anema maaksütsü mapa benshiba ama koda masüba ken o tem atemabo state police ketdangsertemi FIR upload masüyonga kecha masü, ta SC-isa ashi. Bench-isa, tai tonglokja alirtemi, parnok anema benokba FIR ji website nung upload süa mali ta shia obendangdak temeten/taangzük mebushitsüla, ta shiogo.
Iba onük nung Youth Lawyers Association of India-i temepsihsiba ka benokba nung ajemdaker iba tetuyuba agütsüogo.
Temepishiba nungji Delhi High Court-i agizükba telemtetba ka tetshia lir, kong High Court-i city police dang FIR benokba sülen ghonda 24 tsüngda FIRs ji parnok website nung upload asütsü tuyua lir.
High Court telemtetba nungi Supreme Court-i temelenshi kar yanglushia iba tetuyuba agütsüogo.