Stephen King-i Bob Dylan pu asemer

Los Angeles, December 10 (Agencies) : Bob Dylan nem literature atema Nobel prize agütsütsü shimtetba anemertem jagi iba sempet ya kechi atema agütsür ibaji mangatet mesüra pi takok angubaji maginer asütsü akok, ta America nunger kaket zülur Stephen King-i Dylan pusema ashi.
Pai kentensang, Dylan award anguba aitsürtem aser kaket zülur Gary Shteyngart aser Irvine Welsh na anema zülu.
King-i, kentener shingaia Dylan-i ama literature tsütsü yamai mekongshi, ta ashiba independent.co.uk osang ajanga metetdaktsü.
Rolling Stone den interview agiba mapang pai, “Dylan-i iba nobel prize anguba anemertem jagi iba sempet tetettsü mangatet mesüra pi takok angubaji maginer asütsü akok,” ta ashi.
“Gary Shteyngart amai Dylan award anguba anemer kaketzülur aika ni nguogo. Gary, ni na nungi aruba osang angashiogo – Kaket zülur tajung aika iba sempet angutsü langa lir sürnung mangu lir. Aser Gary Shteyngart-a item rongnungji densema alitsü akok,” ta King-i Gary Shteyngart dang chitepa ashi.
Dylan Nobel Prize angutsü metetdaktsüba mapang Shteyngart-i, “Ni Nobel committee ya kechiar metetogo. Parnok asoshi kaket azüngtsü kanga tasak lir,” ta tweet asü.
Pa kija masü saka ano pa den Hari Kunzru aser Irvine Welsh nata dena, kaket zülur tejen aika Dylan nem iba sempet agütsüba ajanga mepelar. Irvine Welsh-ibo iba sempet ya kanga junga meshidangi agütsüba lir, ta ashi.
Kaket zülur Joanne Harris-i, “Ken tejen kar atema literature sempet agütsütsü temsüa lir ta lemtetba ya tan mezüng asü koda?” ta tweet asü.
King-i, “Dylan nem iba akhümket sempet agütsüba ajanga nübur aika nem kishi lapoktsüogo,” ta ashi.