Steven Tyler nem Humanitarian Award agütsütsü

New York, Nov 20 (Agencies) : Steven Tyler-i tangari mezüngshiba nisungtem atema nokdaka iba tebilemtsü ajaki metettsüsa tuteta adokdakja metetdaktsüba mapa tajung inyakba atema pa nem Humanitarian Award agütsütsü metetdaktsüogo.
Aerosmith kentener telok nung kentensangi pa indang Janie’s Fund charity ajanga yimtaklir langurtem yariba atema iba sempet ya pa nem Hospitality Committee for United Nations Delegations-i agütsütsü. Pa indang charity yagi tangari mezüngshiba aser sentoka toker aliba tetsütsü nungiter.
Pai, “Jala asem aser jabaso ka tebu aser joko tebuo ka ama America kija nung küm shia tanür 700,000 tashi mezüngmeshia amshiba aser 68,000 tashi tashiyim agi raksatsüba meteta kü mulung kanga raksa. Mezüngshii amashiba inyakyim – tebang agi merenshiba, shi nung timtemdaktsüba, tashiyim agi raksatsüba aser shisatsü nung okrongdangtsüba – ajak tai lir,” ta ashi.
“Asenok ajak tsürabur ka ama asen tanurtem yaritsü atema sentong tajung akatsü nüngdak. Tanur aika aliba ajanga ibai kanga ataloker aser onoki ibaji melenshitsüner. Ni kü sasa temesepba chiyungtsü nem kokdaktsüba ajanga taküm yiruba jangja meteta lir. Ni iba amaji shinga daka matalokdaktsüner. Kü ola den nüburtem aika ola agi item tetsürtem yaritsü aser tanaben parnok anitettsüji kü mission lir,” ta pai ashi.
Hospitality Committee for United Nations Delegations (HCUND) nung co-chair Mel Gee Henderson-i, “Taküm iba sempet agütsütsü atema onoki Secretary General nükjidong den putepa inyakba humanitarian ka bushia liasü. Iba sempet ya taküm UN Ambassadors’ Ball sentong nung agütsütsü renema lir.
“Steven Tyler ji ken mejemer aser ken atentsü nung ajungba tang masü saka okronga aser timtema alirtem dang kanga aria bilemba nisung ka ta onoki meteta aküm,” ta Henderson-i ashi.
Chairman Luz MacArthur-i, timtemer nisung million aika yariba atema Tyler tenüng as anger, ta ashi.
Lai, “Tyler ji meimlai aliba shim ama aikati bilemtsü akok, ajisüaka kodang onoki Janie’s Fund indang kanga junga meteta aküm, Tyler dak nisung million jenti nem tetsürtem mezüngshiba aser mejungi benshiba metetdaktsütsü tashi lir ta meteta aru. Pai US nung dang masü saka alima ajak nung temelenshi bener arutsütsü,” ta ashi.