Stevie Wonder-i Prince concert nung shilem agitsü

September 16, 2016: October 13, 2016 nü St. Paul nung Official Prince Tribute concert nung Stevie Wonder, Christina Aguilera aser Chaka Khan nunger densema Prince medemertem aser pa sapurtemi asür nem akhüm tetushi agütsütsü.
Kasa kenten sentong nung John Mayer, Tori Kelly, Anita Baker, Mint Condition aser Morris Day nungeria shilem agitsü, ta osang jangjaogo.
Asür Prince atema mapang talangka nungi keyboard temja arusang, Morris Hayes aser Prince indang tatembangbuba kentener telok, 3rdEyeGirl züngsemtemia Prince indang kentem atentsü, ta osang jangjaogo.
“Ozü kibongi ozü adianu Prince nüngtem kenten sentong nung shilem agitsü atema alima nem maongka agütsütsü jangrar,” ta Prince aianu, Sharon Nelson-i sangdong ka ajanga metetdaktsü.
Osang angazükba agi Prince’er kinunger aser tembartemibo iba sentongji Prince’er jila, Minneapolis nung aliba NFL stadium tasenba nung kanüa liasü saka kenten sentongji St.Paul nung aliba Xcel Energy Center nung ang akatsü.
Prince ya telongpo ayangba süngzüktsü atema opium aketba mozü, opiate tali agiba ajanga overdose süa taküm April 21 nü asü.