Stillwater nung Matt Damon den Abigail Breslin longjemer

Chiteni/July 30, 2019 (Agencies): Taruba drama film ‘Stillwater’ nung actor Matt Damon den külemi shilem agidaktsütsü asoshi actress tasen Abigail Breslin anisemogo.
Iba film nung Abigail-i Matt Damon’er jala shilem agiba angutsü.
Arishi küm 23 tain actress Abigail, shibai 2006 küm sayaba drama ‘Little Miss Sunshine’ aser 2009 indang horror-comedy ‘Zombieland’ nung tongti shilem agiba nguogo, lai project tasenba atema director Tom McCarthy den longjemtsü, koba screen nung lai Matt’er jala shilem agitsü, ta osang ajanga jangjatsüogo.
Film nungsa arishi küm 48 tain Matt ya Oklahoma nungi America indang oil-rig company ka nung mapa inyaker shilem agitsü, shibai par jala bushitsü atema pai Marseille, France tesemi aoer. Nisung ka tepsetba ken o temulung melemi bilema Matt’er jala dak tongloktsür sülen la ya tepuokdak yua alir.
Film dak sendakba maparen ya August ita nungi tenzüktsü ternemba lir. Film ya Jonathan King, Liza Chasin aser McCarthy nungeri produce asütsü, kasa mapang asür Steve Golin nem posthumous producing credit award agütsütsü.
Project ya Jeff Skoll aser Mari Jo Winkler-Ioffreda nati executive produce asütsü aser Amblin Partner ajanga Participant Media-i iba film produce asütsü aser senotsü tsütsü nungittsü.
Taküm küm tenzüker külen nungi Abigail mazüngi film balala nung shilem agia arudar. February ita Abigail-i kanga dang yongya ataba ‘Zombieland 2: Double Tap’ tangokzüka liasü. Iba film ya 2009 küm sayaba ‘Zombieland’ film den tatongtep asütsü.
Zombieland film tasenba nung ‘Signs’ film nung shilem agila Abigail-i tanaben ‘Little Rock’ ama Jesse Eisenberg, Woody Harrelson aser Emma Stone nunger den külemi shilem agiba angutsü. Taoba Zombieland original film nunga parnoki shilem agiba nguogo.