Sting-i Bataclan, Paris nung kenten sentong agi

November 13, 2016: France yimtiba, Paris nung aliba Bataclan concert hall nung kenten sentong metenzükdang British nunger kentener, Sting-i 2015 küm November 13 nü Paris lendong nung asürtem bilemteta minute ka shi mokremba noksa nung angur. 

November 13, 2016 : Yaküm Paris nung kiralongrartemi lendong agütsüba sülen Bataclan concert hall nung mezüngbuba kenten sentong Sting-i agiogo.
Iba nüngtugu hall nung November 2015 nung lendong nung asür nisung 89 nem Britain nunger kentener Sting-i akhümtsübu agütsü. Pai, iba sentong ajanga tasürtem bilemteta parnok nem akhümtsübu agütsür,” ta ashi.
Pai iba sentong tetenzükdang France oshi nung jembi, pai, “Asenoki item asürtem mamatsü,” ta ashi.
Sting-i ‘Fragile’ ken tama aden. Iba ken nung “azütokshiba ajanga kecha majangzüker, ta zülua lir.
Gondha ka kentenba sentong nung aruba sen agi yaküm lendong nungi kümzüka alir nisung ana nem teyari agütsütsü, ta Sting-i ashi.
Iba kenten sentong atema adokba ticket 1,000 prong minute 30 tsüngda nung yokma aser ano ticket noklang aika yaküm lendong nung kümzüka alirtem atema yuja liasü.
Sentong reprangi arurtem den yariteptsü atema psychologist aser counselor tem iba kenten sentong akaba tesem nung renemer liasü.
Eagles of Death Metal kentener telok nung kentensang, Jesse Hughes bo Sting kenten Hall nung inyakertem sentong nung adentsü temelaba magütsü kechiba süra pai yaküm lendong atalokba sülen Bataclan luja jembi.
Yaküm lendong atalokba mapang Jesse’er telok shilem agia liasü aser pai indangji Bataclan tesem nung aliba security tema iba mapa tamajung nung densema lir ta ashi, ajisüaka pai tatsüka lir külemi taitok meshiogo.
Lendong atalokba anogo November 03 nü Bataclan tesem shibangtsü aser lendong nung asürtem bilemtetba temaitsü long ka azüngtsü.
Iba tesem Bodhbarnü nungi lapoktsü aser iba sülen Britain nunger kentener Pete Doherty, Marianne Faithfull aser Senegal nungi musician Youssou N’Dour nungeri kenten sentong agitsü.