Stoltenberg-i Russia den sentakba tebilemtsü khuret benoker

Lisbon, November 06 (Agencies): Russia-i Baltic Sea nungi tenzüka Mediterranean tashi tongti tesemtem nung par mitkartem yuja terenemshiba tulu agitsü tenzükba den sentakba tebilemtsü khuret ka North Atlantic Treaty Organization (NATO) Secretary General, Jens Stoltenberg-i yashi Brehostibar nü lemsatepogo.
Portugal kübok Lisbon yimti nung ayonga amenba NATO war games senden nung o jembidang Stoltenberg-i iba tebilemtsü khuret ya lemsatepa liasü.
“Russia-i par mitkartem Kaliningrad, Black Sea aser Mediterranean anüdoklen densemba tongti tesemtem nung yutsütsü tenzüka lir. Item tongti tesemtem nung par mitkartem yutsüba ajanga Russia-i tongti tesemtem amokbangadoka United States (US) densema alima tashi abenba linüktemi tetsükdakba tulu ajurutsüsa tang tensa bener arutsütsü tenzükogo,” ta pai ashi.
Aji oda, tan tensa melenshiba den tapet telangzüba agütsütsü asoshi alima tashi abenba linüktemi nungdakba maparen inyaktsü tajungshiba olen ka Stoltenberg-i yashi senden nung metetdaktsü.
Paisa ashiba agi, Russia-i küm 10 dak tema nung tan mitkar mapatong tuluba inyaker lir aser alima tashi abenba linüktemi Russia-i bener arutsüba timtem ajunga akoktsüsa terenemshiba agitsü nungdaka kümogo.
Ano külen, NATO-i aniba alima tashi abenba linük balala nungi tentetba alima teloktep mitkar züngsem 36,000 shi taoba hopta 3 tejaklen nungi tenzüka Italy, Spain aser Portugal nunger nung ‘NATO Trident Juncture’ ta ajaba mitkar terenemshiba sentong kanga sashia agiba osanga jangjaogo.
Tan agiba mitkar terenemshiba sentong nung shilem agir miktar züngsem 5000-i anir külen teloktep mitkartemi anüng, tzüyim aser ali nunger nung ajurushiba tensa tamajung ajunga azüoktsü alizüng tulu yua lir.