Strawberry tsünertemi teyari tali nüngdaker

Guwahati, March 01 (Agencies): Karbi Anglong kinük nung aliba tesemtem nung strawberry aruhba mapang ka lir, saka item ruhdena aliba strawberry local shishilembadak tilateri nung ayokba alema tangaleni belenshia ayoktsü asoshi teyari magütsüba ajanga timtem ajurur.
Local shishilembadak ayoktsüba dak alaka parnok asoshi tanga lenmang mali, anungji Strawberry lu ayimertemi sen tali ajangzütsü asoshi ‘jams’ aser ‘jellies’ tem yangluner, saka iba süngjang mekonga ayutsü, ayoktsü aser process asütsü asoshi oset aser tenüngdakbatem kecha mali.
“Onoki Karbi Autonomous Council aser Dispur nung sorkar ketdangsertem den aluyimertem asoshi tenüngdakba oset balala teyari meshitsü asoshi jembishinüdar,” ta Karbi Anglong Ginger Growers’ Cooperative Federation Ltd (GINFED) nung Saranphanso, Jiten-i ashi. iba süngjang alu nungi shishilembadaki bener aotsü asoshi mekonga kümzüka ayudak tesem, aser shishilembaba nungi teyari nüngdaker, ta paisa ashi.
“Süngjang tanüngzüktem tajungtiba nung amshitettsü asoshi ‘processing plant’ ka iba tesem nung alitsüla,” ta paisa shisem.
Iba süngjang Diphu subdivision aser Manja nung tsüner, aser Karbi Anglong nung iba süngjanglu ayimer parnok 50 dak tali kümogo. Aluyimer shia-i iba lu bigha tesadang nungbo ayimer.
Kurusar Timung aser PP Hanse nati tama strawberry tsünü tenzük, iba sülen GINFED ajanga strawberry tsünüba nung tesayuba balala agütsü tenzük. Tangbo kanga junga angazüker inyaker strawberry aluyimer telok ka GINFED den lir.
Saranphanso-i yakün November nung iba süngjang metsü 900 ali bigha ana nung atem. Karbi Anglong li nung strawberry rongnung ‘Sweet Charlie’ kanga junga adoker. “Strawberry ya raksaa aoer, anungji iba süngjang belenba mapang kanga kümdanga benshitsü nüngdaker, aji asünung iba asoshi belenshitsüba sentong tajungba nüngdaker,” ta Saranphanso-i maneni shisem.
Strawberriy ya seret ka nung sen 500 nung 800 tashi meshir. GINFED aser agriculture department teyari ajanga aluyimertemi parnoki tsünütetba talirtem dang indangindanga yokteter.