Stroke lendong nungi kümzüka alitsü tasa 5

Stroke lendong nungi kümzüka alitsü aser iba lendong ajurushir taküm anepalutsü den sentakba osangtsüsang alima ajunga dang metetdaktsütsü nükjidong nung alima ajunga nung World Stroke Day küm shia October ita 29 nü amonger. Nisung ka tekolak tonga jajaba azü temang tesem kar nung nokdangadokdang stroke lendong ya ajurur. Alima ajunga nung meimchirtem nem tasüba lendong bener arutsüba tashidak/timtem tesashitiba tarensen nung stroke ya tanabuba lir.
Stroke lendong nungi kümzüka alitsü tasa 5 yangi lemsateper:
1. Temang nung blood pressure ajema alitsüla: Temang nung blood pressure tali akümba ajanga aiben stroke lendong ya ajurur. High blood pressure timtem ajurua alirtemi pei blood pressure teti tendanga, kasaji ajema ayutsü merangtsü nungdaker.
2. Moko machitsüla: Moko achiba ajanga nisung ka indang blood pressure timba kümdaktsür aser iba ajanga stroke lendong bener arutsür. Moko achiba agi azüa telung tentetdaktsür aser iba jagia stroke lendong bener arutsür.
3. Temang meyiradaktsütsüla: Temang tali yiraba ajanga nisung ka indang blood pressure tali kümdaktsür, temulungjang tashidak adokdaktsür aser diabetes timtema bener arutsür. Item tashidak aser timtem ajurua alirtemi aiben stroke lendong ajurur.
4. Chiyongtsü tajung achitsüla: Stroke lendong nungi kümzüka alitsü atema süngjanglijang, süngolio aser iba amala temang nung timtem bener marutsüba chiyongtsü achitsüla.
5. Temang arakzütsüla: Mapang shia temang arakzüa, exercise agiba ajanga nisung ka temang nung blood pressure ajemtsür, temangi nungdakba cholesterol (HDL) timba kümdaktsür aser temang tia tajungba kümdakja, temang nung azü shitak jajadaktsür aser iba jagi stroke lendong nungi kümzüka alir.
(Source : Internet)