STTM aiür chanutem !

Iba yimobilem onük nung ranglokdang, tamasayongi STTM tetezü ya kechi ta tazünger shiai asüngdangtsü südi ta bilema iba yimobilem ya zülur. S.T.T.M tetezü talangba nung ‘School Tatem Tashi Mazünger’. Tetezü school züngtur anenertem lir. Iba tenüng ya ABAM nung tetsürtemi Impur nung Vocational Training Production Center nung mapa inyaktsü sayua anitettsüba purtem bushiba mapang jatet südi. Impur nung lapoka aliba ABAM Vocational Training Production Center ajanga tang tashi nung talisa tetsürtem nem chiyongtsü tapu balala yangluba aser pei teka agi inyakteta taküm alitsü asoshi mapa tapu balala inyak sayuba ajanga kibong aika anisüngzüka lidar asütsü imlar. Joko ABAM nung tetsürtemi iba Vocational Training Center ya tenzüker külen Impur nung soruchiokbasa tajungba kümogo. Iba amaji iba training center nung mapa inyak angazüker aoertembo pei kibong mesütsü asoshi dang masü saka kong lidir, yangji aliba lokti aser nübortem asoshi teyarir tajung kaka süa inyakdar asütsü ta amanger. Atangji, mapa inyak metettsübaji tetsür aser tebur shia asoshi kanga nüngdak lir. Iba nung jagiang taküm lia aotsü tashi angutsü. Tanü asenok loktiliba nung mapa mangu lanurtem paikaya kazütepba ya mazüng memetetba agi masü saka mapa inyak mashiba ajanga lir. Mapabo inyaker meinyakma lir, saka asenoki mapa kata mashi, anungji tagidak maka akümer. Iba jagi lanurtem aika kibong aser lokti nem tajangzük agütsür asütsü melen tebilemtsü bener arutsürtem dang akümer. Atangji, tanü putu nung mapa inyaker meinyakma liaka asenoki meinyaktetbaji lanurtem kija tai masü saka ibaji asen sobaliba dak sentakba tebilemtsü tapu ka lir. Tatishitsü agi, tanü aseen lima nung mapa inyak temelatiba aser sen aatsü lenmang tajungtibaji hotel lapokba mesüra dokan amenba mapa ya asütsü. Ajisüaka, item mapaji asen sobaliba dak maket, anungji asenoki itemji tsümartem mapa amato bilemer. Aji oda, süngo ajemba hotel ka lapokdi asüyonga asenoki singra, bori, julibee, chow aser momo  amtsüktem yanglua mashi, kechiyong itemji asen sobaliba dak maket. Ano, dokan mendi asünunga asenoki osettsüset kong nungi bener arua koma ayoktsüar memetet aser ano metetyonga anogo shia kechalenia moi dokan dokan nung amentsübaji talaktsüka amato bilemer. Iba ama maparen aisü nung asenok tsürabur sobaliba nungi merenloktetba agi timatemba angur. Ajisüaka, asenoki hotel nung amshiba amtsük aser chiyongtsü tajung kar yanglu ashi nung mesüra sü arütsü danga metet nung, iba jagi asenoki asen taküm nung dang masü saka alima nung temelenshi tulu adokdaktsütsü. Aji oda, alima melenshitsüba ya küm aika endoka tazüngba degree bushiba agi masü saka  mapa tilaka angazüka inyakba agi melenshitetter. Iba nükjidong nung ABAM nung tetsürtemi School Tatem Tashi Mazünger (STTM) aiür chanutem anidena mapa inyak sayuba sentong ya tanü asen tendak asen arogo aser loktiliba nung kanga nüngdakba mapa ka tenzükogo. Aji oda, tenüngjia kanga junga bener arutetogo. Shitakba shidi asünungbo tesayur mapa inyaktsü pur aser maparen tapu balala nung ketdangsütsü pur kar dak alaka taküm tajung alidang arishi tesadang ka tazüngba nung endoktsü menüngdaker, anungji school tatem tashi mazüngyonga lokti asoshi nüngdakba mapa ka inyak angazüker inyakra, ibajiang ajak atema temoatsü asütsü. Aji oda, graduate ser mesüra post graduate ser mesüra degree tapu balala bener mapa mangu mapang amajok nung endoka kazütsü agibo, school azüngba nung küm aika meindoki mapa inyak angazüker inyakbajisa ajak atema tajungba aser tajangzük asütsü. Iba ama STTM aiür aser asangur chanutem asoshi Impur nung dang masü saka arogotemi pei pei arogo nung pei yari sentong yanglua mapa inyak sayura, iba jagi arogo asoshia teyari tuluka angutsü. Tanübo asenok arogotemi arogo mapaji hopta nung sentep ana-semka agitsü aser tangar yariba mapatem inyaktsü ta dang bilemer, idangji pei arogo nunger taküm aser tanüla jenjang amadoker. Ibayongji, tesem aika nung arogobo takar saka arogo nungerbo kanga sensaker ta asüba agi sentep kibo tajung saka sentepi arurbo mali ta ataloker. Iba tensa tiaji meyipteptsü atema arogoi pei arogo nung züngsempurtem ajaki langkabosa inyak shia alitsüsa, ABAM tsürtemi inyakba ama, mapa inyaktsü dena sayutsüla.