Sü kümzüktsü atema sorkari teyari agütsütsü: Radha Mohan

Jharnapani, August 07 (TYO): Tanü Agriculture & Farmers Welfare Union Minister, Radha Mohan Singh-i, Northeast nung tribal nisungtem taküm nung Mithun (sü) ya tongtibang shiruru ka lir, aser iba shiruru wazüka ayutsü atema sorkari akokba tashi teyari agütsütsü, ta metetdaktsü.
Union Minister-i anogo ananü state semdangba mapang Deobarnü Jharnapani, Medziphema nung Indian Council of Agriculture Research (ICAR) -National Research Centre (NRC) on Mithun nung “Training-cum-Guest House” lung azünga yutsüba sentong nung jembidang pai iba o jembia liasü.
Sü ya Arunachal Pradesh aser Nagaland na state shiruru lir aser iba shiruru noksa ya Nagaland official seal nunga amshir.
Alima nung Research & development tsütsü sü wazüka ayutsü atema inyakba Institute ji ICAR indang NRC ya dang lir.
Minister-i ashiba agi, iba Institute yagi scientific yimya nung sü metsütsü atema technology development asoshi inyaker, aser ibaji ajanga biodiversity wazüka ayuba dang masü saka tesem sobaliba wazüka ayur aser NE state tem rongsenkettsüng terenlok aser ecological stability nunga jenjang tajungba kümdaktsüogo.
Paisa, Arunachal Pradesh, Nagaland, Mizoram aser Manipur nung tribal nisungtemi ‘mithun’ ta ajaba shiruru metsür. Mithun ya tanga bovine species dang nungi balaka süaka iba ya ancestor `gaur’ den genes mesüktepa lir, ta ashi.
Linük nung mithun lakh 3 shi lir aser item rongnung Nagaland nung shilem 12 lir. Mithun nütsüng ishika dang akümba nung ajemdaker iba shiruru ya metsütsü aser wazüka ayutsü nüngdaker.
Mithun wazüka ayutsü atema technology nüngdak angateta Peren district kübok Jalukie nung Krishi Vigyan Kendra ka amenokogo.
Tanep minister-isa ICAR-NRC campus nung mithun kürakyanglu ka semzükja liasü.
Kasa sentong nung Nagaland chief minister, T. R. Zeliang-ia, Mithun tereprangtsü akhümket nung ajemdaker iba ya kanga senti shiruru lir aser Naga nüburtemi iba ya akhi mapang nungi metsütsüsa aküm aser ‘hon tanak’ ama züngshi, kechiyong iba shiruru ya kiyimba mapang sempet agütsür aser benjung kar nungbo tenlaa agütsür, iba den külemi tanga kiset shiruru den medemdangra iba shiruru ajanga sen timba yokzüker, ta metetdaktsü.
Mithun ya Nagaland state temaitsü lir aser state official seal nung amshir. Mithun ajanga arem wazüka ayuba nung yarir kechiyong iba shirurui tesem tulu nüngdaker, ibayongji alima tsüngsang mopung melenshiba aser alima tatsükba akumba ajema kümdaktsür.
Chief Minister-isa, state sorkari Mitun shiruru metsüba tanga state tem den külemi  ‘Mithun Day’ amongtsü aser iba anogoji kobi melii metetdaktsütsü, ta sangdonga liasü.
Paisa, Veterinary & Animal Husbandry dept.-i Mithun project atema sen lemzktsüiogi ta sangdongba den külemi nüburtem longjemer iba shiruru wazüka ayutsü ayongzük.
Tanep ICAR-NRC on Mithun Director, Dr. Abhijit Mitra-i lokti pelaa agizük aser Annual report-2015-16 cover page design asüba atema local artist, Vikhrutu Rume nem tetushi agüja liasü.