Sub-Divisional Departmental Co-Ordination Forum senden aka

Dimapur, Luroi/August 16 (TYO): Changtongya Sub-Division Departmental Co-Ordination Forum senden ka Luroi/August 16 nü SDO (Civil) Changtongya office Chamber nung anepdang 11:00 ako nungi tenzüka kaogo.
Iba senden nung tawa shimba SDO (Civil) Changtongya aser Forum mendenbuba Moakumzuk Tzudir-i pa metetpela aser senden nung adener ajak pelashishia agizük. Pai SDDCF züngsemtem dang (Head of Officers) nüburtem tenzüktsü aser parnok den teka amteper inyaktsü asoshi pei tata tesem nung pei mapa bendanga agüja inyaktsü asoshi ajungshi.
Iba senden nung taoba senden minutes lepa reprangshi aser tsünglanglen agüja aliba onüktem benoka jembi.
1. Officers/Staffs mapa maoba aser sorkar office shibanga ayuba tashishiba dak sendakba nung sorkar office inyakyim asadanga, temzüng kübok jenjang tapet agitsü asoshi sorkar nem metetdaktsütsü atema ajungbena office tem semdangtsü telemtetba agi. 2. Jila kübok light post, talisa Police Point nung aliba ajak nung street light inoktsü asoshi telemtetba agi. Iba ajanga jila tali tebor jungdaktsütsü aser aonung nüngdak makaba timtem lendong adoktsü aliba nungi jenbutsü
3. Senden nung mendenbubai transformer raksar aliba indang ashishi, koba SDO (Power)-i takaratiba nung anepalutsü, ta sentepa aliba lokti dang nangzük.
4. Senden nung dena alirtemi Forest Ranger dang Changtongya jila tebor jungdaktsütsü asoshi naro apungba aser süngtong tebor tajungtem temtsütsü atema mepeshi, koba 2019 tzünglurowa inyaktsü.
5. BSNL aser Airtel mobile connectivity mapang shia timtem adokba indang senden nung benoka jembi, aser iba dak sendaka aliba office tem dang service timtem kecha madoki agütsütsü mepeshitsü lemtet.
6. Parnokisa Mongputeni/Oct 2018 nung 3buba Inter Departmental Football Tournament ayongzüka akatsü asoshi lemtet.
3buba Inter Departmental Football Tournament 2018 organizing committee züngsemtem yamai shimtsüogo:
1. Moakumzuk Tzudir, SDO (Civil) Changtongya -Convenor
2. Meyisusu Jamir, APRO Changtongya – Secretary
3. Puronen, AEO Changtongya – Member
4. Imkong, SI (2nd OC) Police Station Changtongya -Member
5. Er. Wapang, PWD (R& B) Changtongya – Member