Subansiri ken o tembangtsü asoshi sorkar dang asüngdanger

Guwahati, March 10 (Agencies): Subansiri ayong nung NHPC indang 2,000-MW Hydel Project tekeraba nung atemtsü asoshi state sorkari maparen balala achaayanga inyaktsüla, ta Assam state Assembly ajanga takhangba agütsü. Iba Hydel Project ya Arunachal Pradesh nung lir saka Assam nung aliba telok kati 2011 nung iba tzü nokdang ya meyanglutsü asoshi nokdakba ajanga mapa junga meinyakteti anendaka lir.
“Assam nung terenlok arutsü asoshi iba project ya tekeraba nung atemtsü. Anungji Assam nüburtem den jembiang aser iba dam ajanga takoksa majurutsü ta parnok nem metetdakjang,” ta Assembly speaker, Hitendra Nath Goswami-i ashi.
BJP MLA, Debananda Hazarika-i iba ken o benokba sülen züngsem ajaki iba takhangba ya agütsü.
“Züngsem ajungai longjema renemba asoshi kanga pelar. Iba ken o ya kanga tongtibang aser nüburtem tejangraba densema lir. Iba ken o tekeraba nung atemtsü. Power medenra industry lapoktsü ya tamakoktsü. Sorkari iba ken o tejakleni bener aotsü imlar,” ta paisa shisem.
“Sorkari iba ken o ya opposition telok den jembitsü molunga lir aser Chief Minister Sarbananda Sonowal-i iba mapa achaayanga tenzüktsü,” ta Power Minister, Pallab Lochan Das-i ashi.
“NHPC indang Subansiri project shilem 56 bo renemogo. Iba project anema longkak aitba sülen tentetba committee ajanga sentong tasen aika yangludanga lir. Aser NHPC ajanga item sentong tasentem ajunga agizükogo,” ta Das-isa shisem.
Iba project ya Assam aser Arunachal Pradesh arrtsü nung lir aser India nung iba hydroelectric project ya tulutiba lir. Iba tzü-nokdang yangluba ajanga tsünglanglen aliba Assam nüburtem nem timtem bener arutsütsü tetsübo agi Assam nung aliba nüburtemi iba project anema nokdaka lir. Iba project ajanga Assam nem tesangwa tashi 533MW agütsütsü.
Iba project anema 2011 küm Krishak Mukti Sangram Samiti, All Assam Students’ Union aser Asom Jatiyatabadi Yuva Chhatra Parishad telok temi nokdak.
Iba project ya 2012 küm December nung renemtsü liasü.