Subhas Chandra Bose tayimtsü nung tsükoka asü: Japan

New Delhi, Sept. 01 (Agencies): Tanü tashi India nungeri Netaji Subhas Chandra Bose koma asü’ar iba otsü tejangja memeteti kanga mangmangtepa aliba mapang ka nung shinga nema memetetdaktsüi aliba, Japan sorkari bushisüngdangba osang ka ajanga, pa Taipei nung August 18, 1945 nü tayimtsü tsükokba nung asü, ta metetdaktsü.
Iba osang tejangja ya tan ita tatemlen ang temai adoka metetdaktsütsü aser iba osang ya ajanga Netaji asüba bushisüngdangertem aser ketdangsertem mapa tali tashi itdaktsütsü.
Netaji’er kinungertem aser tang Germany nung alila, par jala, Anita Pfaff nungeri pa mitsüji India sorkar nem Tokyo nungi India-i bener arudaktsüner.
India nungertemi junga aser jangja memetet sürnung kübo tayimtsü tsükokba nungibo kümzükogo ta jembiba angashia temulung kanga masür, ta Pfaff-i tawa ashiba Hindustan Times osang ajanga metetdaktsü.
Japan nungeri pa asüba osang ‘Investigation on the cause of death & other matters of the late Subhas Chandra Bose’ ta tenüng agütsür Japan oshi nung tapak tenet aser English oshi nung tapak 10 adokja lir.
Taipei nung August 18, 1945 nü Netaji tayimtsü nung tsükok aser iba kasa nikongdang mozüki ka nung asü, ta iba osang nung shia lir.
Kasa osang ajangasa, “Pa (Bose) mena aliba tayimtsüji anüngi yimketli ali nung alua tsükdang pa yiru,” ta ashi.
“Nikongdang 3:00 ako meta pa Taipei nung aliba Nanmon Branch, Army Hospital-i anir ao aser kasa nikongdang 7:00 ako meta asü,” ta osang nungjijsa shia lir.
Pa tasümangji August 22, 1945 nü Taipei Municipal leper nung arem, ta osang nungji lir.
Bose’er kinungertem aser tangar aikati mepishiba anga Narendra Modi-i aniba sorkari taküm January ita nungi tenzüka Bose dak sentakba file aika temai adoktsüogo. Par kinunger kar den tangar kari pa tayimtsü tsükokba nungi kümzüker külen tangar nem memetetdaktsüi India nung küm aika liasü ta ashir.
London nung alir,  Bose tanük, Ashis Ray-i, “Iba ya-a ano maitsütetba tongutetba ka lir. Anita Pfaff-i Tokyo nungi tebu mitsü India-i bener arutsü ashibaji India sorkari mangaiang melitettsü,” ta ashi.
Iba osang ya shitakbabo 1956 küm January ita nung renemer Tokyo nung aliba Indian Embassy nung agütsü ta ashir, ajisüaka iba osang ya officially kanga miimshia amshiba osang ka asüba agi linük anaprongi temai madokdaktsüi ayu.