Subodh Biswas nem teyari agütsür 2 puogo

Guwahati, April 9 (Agencies): Silapathar nung AASU office raksatsüba dak sendakba ken o nung aija alisang nem teyari agütsür ana Hokolbarnü West Bengal, Siliguri nung puogo, ta Honibarnü Assam DGP Mukesh Sahay-i ashi.
Teyari agütsür anaji Nikhil Bharat Bangali Udbastu Samannay Samiti, Assam unit nung state tir Sahadeb Das aser Beni Madhab Ray na ta jangjaogo. Tena Dhemaji okadak obendangtsü.
Jalpaiguri nung local okadak ajanga tena anir aotsü asoshi anogo ana mapang agüja liasü.
DGP Sahay-i ashiba agi, iba ajanga ken o aika temai adoktsü imlar.
NBBUSS tir Subodh Biswas-i ajungmesoba sülen iba Hindu teloki Silapathar nung All Assam Students’ Union (AASU) office raksaja liasü. AASU puri state nung kuli tejangja melei arur alirtem amena kanga akanga nokdakba mapang ka nung NBBUSS puria Bangladesh nungi aruba Hindu nungertem atema lisopur jenjang meshia nokdaker.
Sahadeb ya Kalaigaon nungi aser Beni Madhab Kharupetia nungi lir, ta police-i metetdaktsü. Silapathar nung lendong atalokba sülen nungi Sahadeb ya jenshia senzüa liasü. Taoba mapang nung Biswas West Bengal, Bajitpur tesem nungi March 22nü apu.
Subodh ya ozüng alema lokti senden ayongba, nisung tepsettsü merangba, ki raksatsüba aser tamangba yimsü, tesem, oshi aser kin dak ajemdaker kin tsüngta tsükjitep adokdaktsütsü merangba dak ajemdaker aitsüogo.