Subongnuklu Mongsenyimti

  ~ Mrs. Meyisongla, Retd  Dy Director  Nursing  Kohima.

(Taoba adok nungi…)
AO MILEN TENZUKBA OTSU:-
Tsüngremi Mr. Sübongnüklu nem tarutsü mangdang tulu agütsü. Pa molung nung teti bilembaji Ao oshi nung Aotsür Aor rongnung osangtsüsang agi yakta tongteprateptsü kanga yongya. Anungji pa Dacaa nung alidang Bengal Gazettee, Statesman, Jugender (Bengali oshi) aser Tapti Assam News paper tejentem bendena bener aru. Asembuba Ao Students’ conference Waromong nung akadang 1932 küm iba mongdang akatsü ita ana jelia lia sodi agir aru. Mongsenyimti nungi Mopungchuket aser Khar ajanga tetsüng agi Changki-i pa medemer Longritangchetba ajurutsü December 28, 1932 pa apusoa alu. Temenungratsüka rucksack tejen ka nung Newspapesr tejen ishika, Halfpant ka, tula tejen ka, towel ka, ano sapon tagitoh ka ta bener alu. Kanga menurang Changki atong aser pa medemer Longritangchetba ajurua, papertemji ka ken,ka ken ta lushia sayu. Oda asen lima osang kaket kabosa adoktsü ta shia tena 29.12.32 anepdang Waromongi alu. Idangji Longridangchetba mendenbuba liasü. Anungji mezüng sentep nung iba indang süoka jembi. Saka parnok rongnung opangmapu adok. Osangkaket ka adoktsuji- British nungeri memelatsü. Kari ashir, ano iba osangji kechi osangsa asütsü. Shibai menüngtsü ? Kong menüngtsü ? Iba menüngtsü senji kong nungi angutsü ? Kari ashir, British nunger Ao Students’ Conference shipangtsütsü. Item ajak atema kanga shisabulutepa jembi. Kodang Longridangchetbai papertemji ka ken. ka ken ta lushia sayu mongdang nunger ajaki jungabo bilem. Saka majungtsu ta jembia sentepji shipang. Idangji Sübongnuklu molungjang nung retreta bilema tejak mesangwai aküm. Kidangi orr pai mendenpur par pezuji (4) pa anendaki aja. Parnojkji Longritangchetba, Ajangto, Sosangchiba aser Nokdenlemba parnok den tezü medangi jembi. Parnoki ashi, ajak angatetogo kanga junger, osangji adoktsü ta lemtet. Iba osang kaket dang “Ao MESSENGER” ta ajatsüla ta P.R Wicksteant, (American missionary) ashiba jar küm ka aru. Tamasa January 28, 1933 küm adok. Ibai Nagaland aser North East nung mezüng adokba osangkaketji liasü. Ao students mungdang Impur nung amongdang AO MILEN ta melenshi aser yamaji tanü tashi amshia arur. Iba paper ajanga Aor ajak sangwatsüdagi.
Taoba Ao milen yimozülur T.Senkai Sübongnuklu dang yamai asüngdang, “ Oku, osangkaket adoktsü nai yamai jangraba ya koma sür shisatet ? Idangji pai yamai langzu, “Ni Dacaa Engg school nung azüngdang Bengali oshi agi züluba osangkaket nung India nüchiso anguba indang osang sangdong. Idakji nuburtem ajak külemi tejakleni aotsü, anema alitsu, mapa meranga inyaktsü aser kaket shisatsü nung tangar menepa renloktsü indang züluba azüngdang kü molungjang nung kanga kongshi aser ajongmeso, aser ni kanga jangradaktsü. Ni bilem Aor/Naga nunger yamai osangkaket ka adoker nüburtem nem osangtsüsang prokshi- nungbo temoatsü tulu angutsü. Okula Subongnuklui anguba aser metetbaji pa atema dang masü saka nüburtem ajak atema timtem terokrong nüktsü agi anibelem arema mapa küma inyak. Pa kija tashi agi pur medemer tsüngda, Arogo aser Government level tashi nung kanga tashi itta aser tasü itta angatetdakja senzür külenang ibai tongtibang mapaji kümtet. Ao milen adokdaktsutetba aser Ao Kaketshir Mongdang mezüng Longkhum yimdak tenzüktetba mapa ya atamata mapa ka dangbo masü kangasa tesümangtsü ka lir .
Pa ya Founder of – Ao students’ Conference, Founder of Ao milen, Founder of Kohima Baptist Church 1939, mezüngbuba mendenbuba Ao students’ conferernce, Ao Tribal Council chairman 1945-1953, NNC member, Mokokchung nung mezüng newspaper regularsa agir Imkongmeren Longkhum tena dang liasü. Idangji newspaperji Nagachari nungi tetsüng agi belentepa atudang hopta ka sülenang paperji angu.
Langpangkong nunger itemi Changtongya nung meeting mena lemtetba onüktem. 1. Arishingang – chairman (Chuchuyimlang) 2.Pongenmeren – secretary (Merangkong) 3. Limangazuk member (Mongsenyimti) 4. Rebalemba -member (Akhoya) 5. Takujungba -member (Merangkong)
Iba telongjem dang Langpangkong Tzükong Telongjem ta ajatsü lemtet
Nükjidong:- Lenmang aser Telongjem. Lenmangji Amguri nungi Mokokchung, Longkong, Mongsenyimti aser Anaki tashi atutsü. Pei yimtsung lushi nung pei süngo yi aser chitem pei kidang nungi bena mapaji inyaktsü lemtet. Yangji Mr. Rebalemba, mohorir aser Mr. Subongnuklu, Oversseer tenati mapaji reprangtsü ta renem. Subongnuklu mapa nung hapta ka sodi agir angati nübo agi mapaji repranga inyak. Parnoki aooh (Bamboo) pongki nung chi sorua aser süngo molua jema mapaji inyak. Assam chief engineer mapa reprangi atua Amguri nungi Mokokchung lenmang alignment agi molung asü, kanga pelaa. Ibai 1948-1949 kum liasü. Amguri nungi Mokokchung tashi (miles 53) Naga nunger yimtsüng shia shilem balala lemser lenmangji atu. Tamanga mamangtsüka 1952-1953 nungbo Amguri nungi Mokokchung tashi jeep gari atutet. Ibai pongmang tajung asangsang nong atalokbaji liasü.
Dc. Kating, Mokokchung nung alidang Subongnuklui ajayanga Mokokchung nung 1958 kum K.G school ka lapok. Lanur tajung jenti iba school ajanga adokogo. Iba school board membertemji :
Mr. Sübongnuklu chairman- Mongsenyimti
R.C Chiten Jamir, Secretary- Akhoya
Mangyangnokcha -Changki, member,
Arishingang – Chuchuyimlang, member
Imonongba – Longjang, member aser Chubanungba- Longkhum. Member
Mongsenyimti compound nong M.E school ka Sübong middle school tenüng nung private school ka lapok. Ibai tesülen Govt-i agir High school tashi upgrade sür amshidagi. Ano Mokokchung nung Night private college ka 1958 küm, item lenirtem longjemer tenzük. Mr. Sübongnuklu- chairman, Mr. R.C chitten- secretary, membertemji Mr. Temen Aonok , S.C. Jamir, Arishingang, Imnaonen, Imlong chang, Hopongki Sangtem, Imonungba, Mangyangnokcha, Khiloshi. Ibai tesülen Government-i agi aser “FAZL ALI College” ta melen, Governor of Assam, Fazl Ali tenüng nung melen, iba college ya agi nübur jenti tajangzük ngua arudagi. Ibai Nagaland nung mezüng college liasü. Sübongnuklui mapa tajung aika zünger mezüngma inyaka nüburtem nem tajangzük aika agütsüogo. Item rongnung kar yamai :
* Lenmang südaka süngdong tajung eg, Sülemdong atem.
* Longmisa yimdak- 1959 küm, Changki yimdak 1961 küm, Pipe line ajanga tzü supply agütsü.
* Mongsenyimti yimdak 1969-1970 pumping system nungi tzü agütsü (Naga nunger yimtsüng nong mezüng tzü pumping system ajanga agütsba asütsü)
* Mokokchung town map junga yanglushi
* Dr. Imkongliba Hospital yanglu
* Assam rifle camp li nungi lazuka- 1. K.G school ki asü, 2. Ao Baptist tenlaki yanglu, 3. NST aser Bazar area atema ali meshizük, yangji tanübo super market complex yanglua lir. 4. Air field tila dakerta anentsu yanglu, 5. Town nong Lp aser H.S ground ulushia yanglushi. 6. Ao milen aser Ao students’ Conference ngutetsangji. Mr. Sübongnuklu lir.
Par kibong jenjang –
Pai tetsür asem agi, Longjang tsür ka , Mopungchukettsür ka aser Changtongyatsür. Parnok nungi jala jabaso 10, tebur 4 aser tetsür 6. Parnok ajak junga zünger Govt. mapa aser business mapa nung lir. Par jabaso tambusangji Dr.S. Imkong Tushi MBBS,M.S, FICS, FIMSA, FAIS. Pa kanga dang mapa tajet surgeon ka liasü . Pa medical department nung Director inyaka retire asü. tang tashi temang kanga junga dang lir. Tanabuba, Mr. Limatemjen Former Minister, Asem buba Dr. Tiameren, Private practitioner, pezububa Moaba nüngtugu ken mejemer aser kentener. Tetsurtem kar Canada aser Germany nung lir. Kabo shillong nung lir. Atola Sübong. La ya B.D,Vibrant living ministry, tang Director New women ministry Shillong nung lir. La ya vice president, Asia Baptish Women Union, Executive secretary, India Baptist Woman Union nung inyaker.
Mr. Sübongnuklu tamapur technical education angu. Pai mapa kanga meranga inyak. Ochishir, Temeim aketba tulur, ajemalur aser nükjidong tajung akaba nisung. Pai bilemba nukjidong aika tongteta inyaktetbaji pa den yariteper Mr. Repalemba, Mohorir, Akhoya aser medemertem liasü. Ajak dang taoba pai Tsüngrem dak tamang kanga tulu ayuba agi pa pungmangji ataloka takoker taküm ka aküm. Pa süaka pai inyaka doktsüba mapa tajungtem kodanga masütsü, aji alimai metet. Teyanglur Tsüngremi par jala jabasotem aser semchirtem molamoshia moajangma.