Subongnuklu Mongsenyimti

  ~ Mrs. Meyisongla, Retd  Dy Director  Nursing  Kohima.

Tsüngremi tobur junga aser kanga temsüa yangluba limaji Mongsenyimti yim aser alushi yaa ka asütsü südi. Tenem tulu mejungketa tur tenem lenden lisa tesatem. Küm tepiyong mopung tera mokonga aoner. Anü tatok tayi anülih, yimsü kanga tobur tajung telinütsüka lir. Aso 16 shi ogo, Mopungchuket yimtiba nungi oboula Noklangjei Ozükümi anir alua akümba yim lir. Noklangjier japaso asem liasü. Nokpenjang, Nokojungba, aser Elangba liasü. Mongsenyimti yimküm nung Ozüküm kinji kangasa moamejia aser azukarua lia aru. Takataiter, nokinketer aser shisa kar jenti sotet dak yimkong, kü Mongsenyimti yim. Aluyimtsü asoshi lisa tajung aser tetemsü. Ali temo lima. Alu meyimtetsüsa longren longpang yaata mali. Alushir tulu lir, iba jagi kanga yimchiyimjunga moko mersü agi manungi aru. Liper kong kolang tenem ajungketa tua alidak penzü sapang tajong yanglua lir. Yang nung jagi alimaji temenungratsüka angur. Himalaya tenem nung rujeb alaba kanga prangshia angur. Mat-4:8 mojingi Yisüji tenem kanga talang kati anir atu aser pa dang alima yimlitem ajak aser item sentsüwangshi sayuba medem- iba penzü sapang nungi alimaji kanga jangratemtsüka angur. Iba tekong nung metsüben naro (Rhododendrons) ponga liasü. Ano süngpur (tsüki) ariju kima naro kangasa tebur tajong aser teronem agi sünga aliba jetaben aser kimonger narotem ajak Armyi 1956 küm April 30 nü yim ajak metsü küma rongdoktsüdang item ajak rongdoktsü. Arem min tulu ali nung, ozüsangnu jenti eg, yimyi ozü, orük aser ozü tapu jenti liasu. Arem nung süngjanglijang aika aliba agi shiruru jenti liasü. eg Shihtsü, shingo, keyi, pongzü, shihti jenti liasü. Mongsenyimti yim teyong nung long kangasa tuluka kurah mesüker (tortoise) mezüdaka lir. Iba long yagi yim anüker aser warashira mopung tamajung nungi yimer kumzükker ta amanga külem. Ano anüdoklen leper kong tsüng langdang long kanga tuluka shihti (Elephant) mesüker iba long yagi arur tsükchirtem nungi kümzüker. Anungji arlepi aodang iba long tsüngrem kulemshirsa ao aser takok tulu ngursa aruba otsü lir. Item long tenüngteta maja oboula or tampuhsang ta dangsa jaa aru. Iba yimkong ya shisa takar aika sotetdak yim. eg Mokokchung nung republic day amongdang Aortem Nülak songdang- Mr. Yarinnungba, Mongsenyimti first adok. Idangji Mr. Hokishi- chief minister Nagalandi pa dang na item shisatsü kong nungisa angur ta asüngdang, pai ashi tulur, nenokbo shisatsuji kaket aika azüngba nungi angur saka nibo Tsüngremi angati agütsüba amshir ta langzü. Ao lima nung pa kanga nüngtugu shisa kar nisung ka liasü. First world war nung German tawa-i Mr. Limangangzuk Ozükum, Dobashi anir tashi tait aser tasü tait parnok 13 ao. Iba war nung pa nem “veteran man of wisdom title” agütsü .Nisung mashiibo pa den toktepa mejembitet. Kangasa tashi tait nüngtugu nisung Mr. Kensanüken i longzük long tulu kg 150 Elang ayong nungi longzukmen (4 miles) tashi kena maneni apur adok. iba long ayuba jaka dang longzük men ta ajar, aji tanü tashi alu talen aser aremlongen len senzür ajak nok arangshir. Ano British nungeri ozüng agüja longmi süngküm tulu sür talang teyi (8) langa apur Mongsenyimti yim nungi Mokokchung tashi apur tua agütsü. British nungera süngmangba otsüren lir. Pa nem “Herculean” title agütsü. Mongsenyimti nungi Mokokchung tashi (22 kilometer) nokinketer aser taka taiter yim, konang narokem agüja onüla nunger ken mejemer aika liasü. Birtish nunger Ao lima nung Dak Bangalow lapoka par flag mezüng mesoba yim, August ita 1888 küm liasü. Mr. Porteousi British nunger SDO Civil-i Ao yim 33 nungi yimtsü- yimbotem aika jadena meeting tuluka aka. Ao lima nung par tamaren yimli tashi itta aser ulushia yanglutsu indang aser House tax agitsü indang jembi. Iba ama tamaren yimtsüng, takar ka kibong nungi Mr. Sübongnuklu soa intet. Pa, Mr. Shilutemba aser Mrs. Pangjungchila jamir na jabaso, 1900 küm aso.
Dr. E-W Clarki Molungyimsen nung par mission center mesemteta yur pai 1876 küm Ao lima yimti ishika sema jaja. eg , Merangkong, Changtongya, Chuchuyimlang, Mongsenyimti, Mopungchuket, Ungma, Longsa aser longkhum yimtem semdanga liasü. Tangarbo idangji-sa tamangba yimsü agizük aser mission school lapoka tashi temetet ngua, kangasa temelenshi tulu nung ali. Saka Mongsenyimtibo Tsüngremi temoatsü tulu agütsüba agi asüküma konang narokem toktepba yongrak mesalatet. Temenen nung süng long külema alitsüang jangratep. Yimsü amanger pari ken tena senzüba agi tepok asüngtsü masü. Shitiji mejaktsü masü, alusa inyaktsüla ta shia küm 40 tashi atsüngzüka lir, 1915 kum, Dr. G.R Bailey- Impur nongi tesayur Waikaba Longpha yok. Amangtsü menokdangtsü ta nangzuükteperang yok. Tesayur Waikabai pa kiji school/tenla ki ama amshia, tamangba yimsü aser shisaliok agütsütsü tenzük.
Iba jagi Mongsenyimti nunger Aor ajak dang nungi-tashitemetet aser tanüla lenmang nung rahjang kümer- pur bendanger memenep tanü tashi iba komo jagi kangshir. Ozü yimdak school 1916 Feb. ita nungi lapok. Iba school first batch nung Mr. Sübongnuklu azüngtsü tenzük. Pa kum 16 asüdang, School-i oa yimdak nungi Impur mission school nung azüng. Par tsüraburi school bo züngdaktsütsü saka amangtsü memela saka Impur azünger tamanger aser mamanger ajak sentep nung adentsüla aji mesüra temerenshi achi. Pai sentep nung dena Yisu Khristai agütsüba tepela aser kümzükba indang angateta amang-nung tsüraburi pa kidangi marudaktsü aser teyari magütsü. Saka pai maneni Tsüngrem teyari atema sarasadem. Aser Tsüngremi pa sasasadem langzü. Pa kodang Class V1 pass asü, part time mapa class 1 pur sayutsü chance angu. Ano school chowkidar mapa inyaktsü mapa agütsü, ita nung Rs 5/- item sen yagi pa school fees/chiyongtsü aser süoshi alia peridaktsübaji sayatenya mapa ka liasü. Pa sarasadem agi tsürabur molung meyiba amang aser pa tanaben agizük. Pa Jorhat nungi Class 10 first division nung pass asü. Ist matriculate Langpangkong tsükong nungi. Pa Forest dept nung mapa ngur inyaka lia, Dacca Engineering school nung azüngtsü maongka angu. Pa züngzüker mezüng town overseer Dimapur nung inyak, yang nungjagi Deputy Commissioner office Kohima, Mokokchung, aser Nagaland nung tesem aika nung inyaka senzü, SDO promotion angu. Iba mapang nung technical azünger mali asüji CPWD, Roads and Bridges, Housing, water supply aser Electricity department ajak nung pa incharge süa inyakba records tejangja yua lir. Department ajak nungji pa mapang temenlenshi jenti bener aru.
AO STUDENtS’ CONFERENCE TENZüKBA.
Ao students mongdang tenzüktsü jembidang tenokdangba aika liasü. Ao mongdang Standing Committee yamai sangdong. Koba yimi iba mongdang akatsü agizükdir, mongdang nungi indoktsü ta ozüng tesashi agütsü. Parnoki students conference ajanga Ao lima tamangba yimsü aser yimten mapa ajak nung teraksa bener arutsütsü tsübu. Anungji mungdang Standing Committee meeting Changtongya yimsen nung 1925 küm amendang, Mr. Sübongnuklui parnok dang, Ao students mungdang nükjidong ajak rasaa ashi (aims objects) committee member temji Rev. Subongwati, Mr. Temendangba, Mr. Samar, Pastor Waikaba, Imnukenba aser Mr. Jongponglemba nunger liasü. Parnoki, ashi nenok nükjidong tajung süra junga liang, Arogoibo menokdangli ta shir yok. Iba tepela kanga tulu liasu. Saka nenoki civil SDO Mkg nungia temelaba agitsüla ta parnokisa ashi. Iba atema tebilemtsü tulu lia Mr. Lyod,Reeves SDO civil Mkg Mongsenyimti Dak Bangalow nung alua anen. Hd Dobashi Onglinago tena Longjangi alur anen. Anungji Mr. Limangangzuk, Dobashi Mongsenyimti aser Subongnuklu tena Longjangi alu. Idangji pai Ao students conference akatsü indang aser iba Aims/objectem ji shia alu, anungji iba atema na nungi temelaba aginer ta ashi. SDO-i tepang agi temelaba agütsü. Saka hopta ka jilia lia iba mongdang programm ji ka kü office nung agüjang ta ashi. Ibai April 1927 küm liasü. Iba mapang British nunger SDO civil ajurua nüngdak jembitsüji molusongzü jak nung pongloktsü ama tsübutepa aliba mapang ka nung, Tsüngremi mapang tajung lapokja yamaji mapa akümbaji kangasa tulu liasü.
“KONG MOLUNGTETBA LIR, YANGJI LENMANG LIR”
Anungji Ao students’ conference ji Longkhum yimchiyimjung lima, shisa kar jenti aser Aor rongnung tashi temetet nung mezüngpur lir, yangji liasü. Longkhum dang Ao Fonemru ta ajar Aor chipo makettsü. Tetezü parnoki, moya Tsüener tsükchirtem nungi nokdanger Aor kümzüka ayuba agi ajar. Iba ama tejakleni aoba taka taiter yim nung mezüngbuba:- “AO STUDENTS’ MONGDANG” December 1929 küm ayongzüka aka.
Iba mongdang mendenpurtemji:-
Mendenbuba – Mr. Subongnuklu, Engg School Dacaa (Mongsenyimti), Menden yariba- Mr. Nokdenlemba -Shillong, Tongti zülur Mr. Longrikaba – Med- Dibrugar, Teyariba Mr. Kejungluba, Shillong, Senyur Mr. Sendonglemba Gauhati, Teyariba Mr. Imkongliba Shillong.
(Lemang onsara talang nungi olioratsü tasak. Brahmaputra ayong tulu, rong tila nung asemben pezüben ajanger, Assam nung train agi aser Naga limabo tetsüng agi jaja arudang, mongdang memenep, anungji pa yarisangi mendenji agia mongdang aka). Student mongdang ngutetertem ta parnok dang aja.

(Maneni taruba adok nung…)