Sudan linük nungi India nunger 85 Kerala tonga aruogo

July 15, 2016 : Hokolbar anepdang South Sudan nungi India nunger New Delhi nung aliba Palam airport tonga arudang junior foreign minister, V.K. Singh-i agizükba noksa angur. Tajemba agi India nunger 156 rara adoka aliba South Sudan nungi anir aruogo. Parnok rongnung nisung 71 Indian Air Force tayimtsü ka nung New Delhi tonga aru aser tanüngba India nungertemji IAF tayimtsü ka nungsa Kerala yimtiba, Thiruvananthapuram tonga aru.

Thiruvananthapuram, July 15 (Agencies): Rara adoka aliba linük, South Sudan nungi Kerala nunger 46 densema India nunger parnok nisung 85  Indian Air Force (IAF) tayimtsü ka ajanga Hokolbarnü Kerala yimtiba, Thiruvananthapuram tonga aruogo.
Rara adoka aliba linük nungi kümzüker rongnungsa tetsür tenet, tanur asem aser Nepal nunger ana densema liasü.
India nunger ajak agi parnok 156 tashi IAF indang C 17 Globemaster tayimtsü ana nung anir aru aser India nunger 71 amenba tayimtsüjibo Delhi nung anenzük.
Tanep parnok Kerala yimtiba tonga aruba sülen state sorkari tangartemji peipei state-i aotsü atema anepaluja liasü.
Parnok rongnung nisung ka tenüng agi Anil Kumar-i osangbenertem dang, tan hopta tetenzüklen nungi South Sudan nung injang taliba yokdar, ta metetdaktsü.
“Anogo pongu jungnüa injang kanga sashia yokdar, ibayongji onoki meyipa arutsü lemtet. Yashibo süngjema liasü, ibayongji onoki airport-i melamela arutet,” ta paisa ashi.
Ano Kerala nunger katia, South Sudan nung tensaji tetsübutsüka lir aser tsükchirtem tsüngda rara sashia tenzükogo, ta ashi.
“Ozü kikümdong anasa nisung ka kahset aser onok aikati pei tetsü tasoli joko kodanga mangutsü ta bilema liasü. Injang sashia yokdar aser anogo pezünü tashi onok kimai khen tanga mayazüki ki telung nung dang liasü,” ta paisa ashi.
Anosa parnok rongnung kati, “Iba tensa reprangteta mapa tajung inyakba atema onoki sorkar aser yangji (Sudan) aliba Indian embassy dang pelar. Sudan kin ana tsüngda mangatettep adokba ajanga tang tensa yamai akum. Yangji tensa tanaben süngjemra ni meyipa oner,” ta ashi.
Africa nung aliba linük nungi India nunger anir aruba maparen ya India sorkari benokba ‘Operation Sankat Mochan’ den sentaktepa lir, aser iba operation ya Minister of State for External Affairs, V.K. Singh lenisüba nung inyak.
Tanep yakta Kerala sorkar tenüng nung State Electricity minister, Kadakampally Surendran aser district ketdangsertemi tayimtsü anendak India nunger agizüka liasü.