Sudan nung jenjang atuba anema longkak aiter ti tepset

Khartoum, Luchii/Dec. 21 (Agencies): Oset nung jenjang atuba aser rongsenketsüng tsütsü jenjang mejungi akümba ajanga nüburtem tejashi agi Sudan linük ajunga nung ananü buba longkak aitdang nisung tajemba agi ti tashi tepsetogo.
Ketdangsertemi anüdoklen aliba Gadarif yimti nung state of emergency Yangtepnü sangdong, kong riot police tem den longkak aiter raratepdang nisung trok asü, ta legislator Al-Tayeb al-Amine Tah-i osangbener dang ashi.
“Qadarif nung tensa mejungi kümogo aser longkak aitertemi mi amshir aser auyar aser tangbo parnok mazüokteti kümogo,” ta parliament züngsem Mubarak al-Nur-i Reuters news agency dang ashi.
Northeaster tsütsü aliba Atbara yimti nunga longkak aiter ana süogo, kong longkak aiter senshidaktsütsü asoshi police temi tear gas khalokja liasü.
Iba yimti nung aliba Tir Omar al-Bashir’er National Congress Party (NCP) indang headquarters nung longkak aitba ajanga ketdangsertemi yimti nung curfew benokogo.
“Longkak aitba ya tesunep nung tenzük aser iba sülen tamajungba küma kiojen raksatsü… Onoki state of emergency sangdonga curfew benok aser yimti nung school tem shibangdaktsü,” ta Nile River state indang governor, Hatem al-Wassilah-i ashi.
Rasemnü sorkari am (bread) jenjang timba kümdaktsütsü latetba ajanga nüburtem ain adoka longkak ait tenzük. Sudan nung am ka nung sen Sudanese pound ka ($0.02) meshia liasü aser sorkari am ka nung sen Sudanese pound asem ($0.063) meshitsü lemtet.