Sudan nung kaketshir 22 tzü nung arakset

Khartoum, Luroi/August 15 (Agencies): Sudan nung school tanurtem school-i aoba mapang parnok mena aliba rong ya Nile ayong nung mükepoka tanur 22 asü, ta ketdangsür osang ajanga ashi.
Sudan yimtiba, Khartoum nungi kilometer 750 shi bilar rong mükepokba nung tetsür ka densema asü aser iba rong nung tanur 40 dak tali liasü, ta SUNA news agency ajanga Rasemnü sangdong.
Nile River state kübok Beheir district nung tzünglu tesashi aruba den külemi mopung sashia aonba ajanga rong indang gol raksar iba lendong ya atalok.
Civil defense force temi Nile ayong nung maneni asürtem temang bushiba mapang lir.
Ayong ajangtsü asoshi yimdaklirtem süng agi yangluba rongtem amshir.
Iba rong ya tzüsem tesashi nung ajangtsü merangba mapang iba lendong ya atalok, ta tenük kuli alir kati osangbener dang telephone ajanga ashi.
Iba tesem nung aliba kibongtem ajunga mangyim tia nung lir, ta paisa shisem.
Rasemnü tzünglu den mopung tesashi aonba ajanga province kar nungbo ki noklang aika raksatsü aser Sudan sorkari Khartoum tesem ajaklen kaket rejutem shibangtsü ozüng agütsü. Iba yipru tesashi yangi North Darfur aser North Kordofan nung densema ki raksatsü.
Taoba hopta nungi tzünglu tesashi aruba ajanga Sudan nung nisung 40 jungnüa taküm samaogo aser Khartoum kisüng nunga nisung 10 taküm saka, ta osang ajanga ashi.