Sudan sorkari Khristantem anema rarar; Muslim nunger Khrista agizüktsü tsübur

February 28, 2017 (Agencies) : Sudan nung Khristan sannüker kati ashiba agi sorkari Khristantem anema raratsü sangdongogo.
Muslim nungertem Yisu Khrista dangi anir aotsü ta tsübua bilemba agi Khristantem anema raratsü sangoktsü. Iba yongji Islamic linük nung sannükertem tepuokdak ayur aser tenlakitem raksatsür, ta sannükeri ashi.
The Christian Post tenüng nung International Christian Conern’s East Africa teloki South Sudan nung Khristan sannüker ana den ajurutepa sensaksemdang, 2011 küm linük ana küma lemdangba indang tenati ashi. Tenaprongla ya taoba mapang Sudan nung tepuokdak ayu.
“2011 küm South Sudan nüjiso anguba sülen 2012 küm ni aser ozü kibong Juba-i belen” ta Pastor Michael Yat-i ashi.
“2014 küm ni South Sudan Evangelical Presbyterian Church nungi mapa lemzükba inyaktsü atema Khartoum-i ao. Iba mapang ni Sudan nung Khristantem anema rara sangdongba osang mangazük liasü, aser tasüngji Khartoum nung tenlaki ka nung o jembiba sülen ketdangsertemi ni apu. Idangji ni ita 9 tashi tepuokdak ayu” ta Yat-isa ashi.
Sudan sorkari parnok linük nung Khristantem melidaktsünür aser talisa Arabic oshi jembiba Khristantem parnoki meyunür. Arabic oshi jembirtemi Muslim nungertem Khrista dangi anir aotsü ta sorkari tsübur, ta paisa shisem.
“Sorkari pastor tem Khartoum, Darfur aser Nuba mountains-i aotsü nokdanger. Item tesemtem ya Muslim nunger teimba sür aliba tesemtem lir” ta Yat-isa metetdaktsü.
Tesüiba ita ishika tsüngda Sudan nug Khristan sannükertem aika puogo aser parnok teimbaka national security onük nung ajemdaker tai tonglokja apu. Iba inyakyim anema American Center for Law and Justice amala teloktemi alima sabang nung mapa inyaktsü tenzükogo.
Küm 12 tashi pa tamangba yimsü atema tepuokdak yua alisang, Rev. Hassan Abduraheem chiokang ta item teloktemi takhangba agütsür.
2011 küm South Sudan razüka aoba sülen nungi Sudan ya Islamic state ka ama inyaksangshia arur aser Khristantem reshikangshir, ta Pastor Peter Yein Reith-ia ashi.
Khristantemi mapa inyakba nung süngjang atangba ajanga Sudan nung Khristantem reshikangshiba bulur, ta Reath-isa shisem.
Khartoum aser West Sudan nung tenlaki aika shibangtsüba agi sannükertem aika tetsübu tia nung alir, kechiyong parnok mashi mapang ka nung ketdangsertemi aputsü akok aser tepuokdak ayutsü, ta paisa metetdaktsü.
Michael aser Reith na Sudan nung ita trok tema tepuokdak ayu aser tena nem tasüba temerenshi obendang agüja liasü.
Tena chiokba mapang American pastor, Rev. William Devlin Khartoum nung liasü aser pai Christian Post dang ashiba agi, snnüker ana tepuokdak ayuba mapang Khristantemi tena chioktsü atema kanga lumia sarasadem.