Sudan Sudan nunger 40,000 dak temai ayawara tia ajurutsü akok: UN

South Sudan kübok Leer jila nung International Committee of the Red Cross tentet nungi chiyongtsü lemzüktsü teimla nung S Sudan nübur 30,000 dak tema sentepa aliba noksa nung angur. (Leer, February 09)

 Geneva, February 09 (Agencies): South Sudan nung chiyongtsü peria mongui akümba ajanga par nübur nisung 40,000 dak temai ayawara tia ajurutsüsa tang tensa aliba osang ka United Nations (UN)-i tanü, Mongolbar nü metetdaktsüogo.

Tan tesüsa Integrated Food Security Phase Classification (IPC) osang benokba sülen S Sudan linük indang nütsüng yongsük noklang nung shilem 23 shi, nisung million 2.8-i taküm 2016 küm January nungi March ita tsüngda chiyongtsü peria mongui timatemtsü akok ta osang bushitetogo.

UN kübok tentetba Food & Agriculture Organization (FAO)-i ashiba agi, chiyongtsü peria mongui timatembaji taküm April aser July ita na tsüngda tesashiba asütsü kechiyong alima ajunga nung iba mapang chiyongtsü ajema angur.

Unity, Jonglei aser Upper Nile nung tentetba state-tem nung alirtemi chiyongtsü peria mongui akümtsü khuretji tuluba ajurutsü ta par tentetisa metetdaktsüogo.

UN-isa ashiba agi, S Sudan nübur aikati tzüda nung chiyongtsü bushia aliba den külemi, parnoki ango aser tzü nung apongba narotem chia tang taküm alir saka takong mapang aruba sülenbo tzü ajunga kongadoka parnoki chiyongtsü mongui akümtsü.

“S Sudan nung nüburtemi chiyongtsü peria mongui ayawara tia ajurutsü ana nung dang lir. Par linük rongsenren tia kanga mejungi aliba yong nübur timbakati pei kibong atema chiyongtsü malizükteti kanga dang rokonga aliba osang buhiteta lir,” ta FAO nung chief technical advisor, Eminio Sacco-i metetdaktsü.

2013 küm December ita nungi tenzüka, Tir Salva Kiir aser opposition lenisang, Riek Machar na tsüngda mangatettep tulu adoka tena sülen anidaker rong nung tongpang kanga sashia raraba ajanga S Sudan nung nübur million 2 dak temai pei talidak melitettsüsa küma tesem balala nung jenoka aliba osang bushiteta lir.

Yaküm, 2015 küm August ita agiba yimjung tezüngzüktep mapa küma benshitsü asoshi UN-i S Sudan lenirtem ajungshia lir saka sorkar aser sorkar anemer telok na tsüngda tongpang rarabaren maneni lir.