Sudan tir al-Bashir-i linük nung Emergency sangdongogo

Khartoum, Tsüklai/February 23 (Agencies): Sudan tir Omar al-Bashir küm 30 tejakdang tashi dangi aruba sülen tang mezüngbuba sorkar anema nokdakba kanga sashia akümba mapang ka nung pai Hokolbarnü küm ka atema emergency sangdongba den parliament dang constitutional amendments atsülangshitsü asoshi asüngdangogo, koba ajanga 2020 tir election nung pa maneni term ka inyaktsü asoshi temelaba agütsütsü.
TV nung sangdong ka ajanga Bashir-i sorkar loksaba sangdonga liasü.
“Sorkar tasenba-i rongsenketsüng nung inyakyim takhang ka benoktsüla,” ta Bashir-i ashiba den pai iba mapa ya temsüa aliba telok ka nem nongloktsütsü ta ashi.
Paisa opposition dang , “opposition shirnok linük longjemtsü asoshi inyakba lenmang nungi atsüngina lir, ni nenoka ajak dang linük tang koba tia nung lir iba indang sensaksemtsü asoshi pelashishia jaoker,” ta ashi.
Iba sülen Bashir-i jenjang tanga ka agi ministry ajak nungi ketdangser tejentem agi kümtetba caretaker administration ka tentettsü, saka defence, foreign aser justice ministery tem dak mekongshi.
Oset nung jenjang timba akümba aser sen agi anünga akümba sülen sorkar anema longkak aitba ya December 19 nü tenzük, saka iba sülen iba longkak aitba ya Bashir yimsüsüba anema aküm.
Bashir-i o jembiba sülen Omdurman yimti nung longkak aitertemi “nüjiso” ta yimyima ayimba den gari tsüng ronga lendi nokdanga ayu, ta Reuters sangdong ka ajanga metetdaktsü. Iba sülen police temi longkak aitertem dak tear gas khalokja parnok minshi.
Sudan nung opposition telok tongtiba National Consensus Forces puri ashiba agi, Bashir-i emergency sangdongba telangzüba agüja longkak aitba sentong tali ayongzüktsüla.
“Onoki sorkar anema nokdangba nokdangtsü atema emergency ya sangdongogo, ajisüaka onok nükjidong matalok tashi iba ya manentsü,” ta parnoki sangdong ka ajanga metetdaktsü.
Longkak ait metenzük tsüngda hopta ana lia MP timba kati Bashir nem ano term ka bendaktsütsü asoshi constitution nung amendment ka benokba pusema liasü. Saka taoba Honibarnü parliamentary committee koba nem iba mapa nongloktsü, parnoki iba temelenshi bener arutsü atema senden amentsü aliba ya mapang tatakzük ka makai atsülanga ataba sangdongogo.
Bashir-i o mejembi tsüngda linük yimtiba Khartoum nung longkak aiter 200 shi sentepa aliba security forces temi tear gas khalokja senshidaktsü, ta tenük kuli angutsürtemi ashi.
Longkak aitba ayonger lokti tongiba Sudanese Professionals Association (SPA) puri maneni longkak aitsü asoshi ayongzükogo.
“Longkak aitertem takhangba tejangja lir. ajak dang tongtibangbaji iba sorkar aser tekolakba atsüngintsüla,” ta SPA-i sangdong ka ajanga metetdaktsü.
Bashir ya Islamist ka aser taoba mapang army officer ka liasü. 1989 küm military-i coup asüba sülen pa tashidangi aru. Southern rebels tem den yimjung asoshi tenangzüktepba ka yangluba sülen constitution nung temelenshi bener aru aser iba sülen pai 2010 aser 2015 nung election kokogo.
Ajisüaka pai pa yimya melenshia longkak aitertem ya timba lanurtem dang lir aser nükla tajung malirtem ta shia liasü.
Sorkar anem nokdakertemi ashiba agi, longkak aitba mapang nisung 60 shi süogo aser kasa mapang nung ketdangsertemi ashiba agi, tang tashi nung security 3 densema nisung 32 süogo.
Security force temi tear gas aser injang amshia longkak aitertem senshidaktsüogo aser opposition party, osangbener aser longkak aitertem densema nisung noklang aika puogo.
Darfur tesem nung kin ka tepsetba nung tongti shilem agiba atema International Criminal Court-i Bashir aitsüogo koba pai anemogo.
United States-i 2017 küm sanction benoka aliba aginba sülen senotsü tsütsü teyari angutsü imlaa liasü saka item taitsüba ajanga par linük nung sen indoktsü aser teyari agütsütsü nokdangogo.