Sukanta Chakraborty tepsetertem puogo

Agartala, Chiteni/July 7 (Agencies): Tripura kübok yimdak yimtsüngtem nung tanur apur senzüba indang olulu prokshiba dak sendakba nung tekümdangtsü metetdaktsütsü asoshi sorkari yokba arishi küm 33 tain Sukanta Chakraborty tepsetba ken o nung aija alirtem rongnung tongtiba Sunil Mohan dena parnok tekü puogo.
Sunil Mohan ya Yangtepnü south Tripura district kübok Sabroom tesem nungi apu. Kasa mapang nung aija alirtem rongnungsa Hiren Tripura, Belonia sub-division kübok Iswar Chandra Vidyasagar College hostel ka nungi tanü puogo, ta IG (Law and Order) K V Sreejesh-i ashi.
“Sukanta Chakraborty tepsetba indang video footage ka onok ket nung lir. Pa ya video dak sendakba nung aser tashishiba balala dak ajemdaker apu. Onoki video ajanga aija alirtem ajak ya nisung tepsetba nung densema aliba ngutetogo,” ta pai ashi.
Taoba mapang nung nisung tenet pua lir. Assistant Sub-inspector of police ka aser Tripura State Rifles (TSR) personnel ana densema police police pezü tashi iba ken o dak sendakba nung mapa nungi anentsüogo.
Sukanta Chakraborty ya South Tripura district, Sabroom sub-division nung alir aser pa Aami/June 28 nü Kalacherra yimtsüng nungi meyipa aruba mapang nung tepset.
Pa ya state Information and culture department-i hire asü. Maneni tanur apur asütsü ta temulung melemi tetsür ka aser yimtong nung yokyatsüyar ka ta kasa anogo nung tesem balala nung tepset.