Sultan Azlan Shah Cup mezüng asaya India-i makok

27buba Sultan Azlan Shah Cup-2018 Hockey Tournmant nung Argentina nunger asayar Gonzalo Peillat, India nunger asayartem den ball raktepba noksa nung angur.

Ipoh, Metsüremi 03 (Agencies): Küptoknü (Saturday) 27buba Sultan Azlan Shah Cup hockey asayamung mezüngbuba asaya nung Olympic nung Champion Argentina-i India madak 3-2 agi takok ngutetogo.
Iba asaya nung Argentina nunger drag-flicker Gonzalo Peillat-i minute 13buba, 23buba aser 33buba nung goal asem idakja pai hat-trick angu. India asoshi Amit Rohidas-i penalty corner ana ajanga minute 24buba aser 32buba nung goal ana idakja liasü.
Asaya mapang tzünglu tulu arua liasü aser iba ajanga quarter-pezübuba nung asaya anentsüsa akum. Tzünglu anener sülen asaya tenzüka aoba mapang India nunger Sumit Kumar nem yellow card ka agütsü aser iba ajanga India nunger asayar 10 dang kümadok. Asaya atemtsü anasa parnoki draw asütsü atema kanga meranga asaya aser Talwinder Singh-i tera agi dang goal ka magütsüi asaya tembang.
Amungnü (Sunday) India aser England na asayatsü. Iba asayamung nung Australia, Ireland aser Malaysia nungeria shilem agidar.
Maneni, iba asayamung atema India team nungi tongti asayar Akashdeep Singh, SV Sunil, Mandeep Singh, Manpreet Singh aser goalkeeper PR Sreejesh nunger meshim, iba den külemi Drag-flick asayar mongin Rupinder Pal Singh aser Harmanpreet Singh nata anisüngzükdaktsüogo, aser iba ajanga iba asayamung nung India nunger asayartem timba ka lanurtem dang lir.