Sultan Cup: India-i goal 5-1 agi Pakistan akok

Ipoh, April 12 (Agencies): India’er hockey teloki goal 5-1 agi Pakistan telok madak takok ngua tang tasayadak Sultan Azlan Shah Cup hockey asayamong round-robin league asaya nung tanü, Mongolbar nü shilem agiogo.
Tanü asaya tenzüker minute 4 buba Manpreet Singh-i 1 buba goal agüja par India telok temaba jenjang nung ajungkettsüba sülen Muhammad Irfan-ia minute 7 buba nung par Pakistan telok asoshi goal 1 agüja par telok anaprongla kasa jenjang kümdaktsü.
Ajisüaka, SV Sunil-i asaya tenzüker minute 10 aser 41 buba na nung goal 2, Talwinder Singh-i minute 50 buba nung goal 1 aser Rupinder Singh-i minute 53 buba nung goal 1 agütsüba yong Sardar Singh-i aniba India teloki goal 5-1 agi Pakistan madak takok ngua liasü.
Tan takok anguba ya densema, India teloki 2009 küm nungi tenzüka tanü tashi nung Pakistan den 5 ben tashi asayadang 4 ben tashi takok angur lir.
Tan takok anguba densema, India teloki asaya 4 nung ajak agi points 9 ajangzüka Australia telok sülen anidaka, tan asayamong nung shilem agir telok tarensen nung 2 buba jenjang nguogo.
Taoba küma bronze medal agizükba India teloki tan takok anguba ajanga par teloki tan asayamong nunga medal agizüktsüsa jenjang tajung angur lir.