Sumi & Chakhesang brotherhood fellowship agi

Kohima, December 11 (TYO) : Sumi Baptist Church Kohima nung Deobarnü Sumi & Chakhesang Brotherhood Fellowship tesentaktep akangshiba sentong ayongzüka agi.
Iba sentong ya Sumi Hoho Kohima aser Chakhesang Hoho Kohima kübok ayonga agi aser Chakhesang Baptist Church, Minister’s Hill Kohima nung senior pastor, Rev. Dr. Vevo Phesao-i Tsüngrem o jembi.
Rev. Dr. Phesao-i kin anaprong dang, Tsüngrem nem bendanga agütsüshitsü aser tesüiba mapang aibelena inyaksema lir tatok meshitsü ayongzük.
Sentong nung Chakhesang Hoho Kohima president, Theja Therieh-i salem osang metetdaktsüdang, Sumi aser Chakhesang nunger tsüngda tesentaktep ya maneni tashi taitba kümdaktsütsü aser mapang tajung aser tamajung ajak nung kati ka yariteptsüla, ta ashi.
Naga nunger ajak longjemtsüsa asenoki tatishitsü keta tesentaktep akangshitsüla, ta paisa ashi.
Sentong nung Sumi Hoho Kohima president, Dr. Vinito Chishi-i tesentepertem pela agizük aser Chakhesang Public Organization (CPO) president Kekhwengulo Lea-a aden.
Sentong nung mendenji Sumi Baptist Church Kohima Associate Pastor, Kitoshi Kiba liasü aser sentong tembangba sülen Sumi Baptist Church Kohima aser Sumi Hoho Kohima nati lokti chiyungtsü anepalua chiyungdaktsü.