Sumi nungertemi NSCN (IM) mokdangba agiener

Dimapur, September 3 (TYO) : September 3, 2015 nü Sumi Hoho-i Town hall Zunheboto nung Sumi nunger Lokti Senden ka ayongzüka agidang Sumi nungertemi NSCN (IM) mokdangba indang onük benoka jembi.
NSCN (IM) züngsemtemi Sumi nunger sobaliba aser Khristan tesayuba anema Sumi nunger tetsür missionary ka dak tim mesüi kongshiba ajanga Sumi nungertem temulung yirutsü aser iba tatalokba sülen Sumi Lokti Senden (Sumi Baghi Hoho)-i January 7, 2014 nü NSCN (IM) mokdangtsü telemtetba agir tanü tashi aru, ta Sumi Hoho sangdong ka ajanga metetdaktsü.
NSCN (IM) lennirtemi August 24, 2014 nü Sumi nunger dang tezüluba nung nangzükba aser tatok meshiba nung ajemdaker September 3, 2014 nü Sumi nungertemi NSCN (IM) mokdangba agientsü telemtetba agi, ta Sumi Hoho tir Toniho Yepthomi aser tongti tezülur, Vihuto Asumi nati külem sangdong nung shia lir.
R.N. Ravi, Interlocutor aser Th. Muivah, General Secretary, NSCN (IM) na tsüngda sign sütepba Yimjung Tenangzükba nung aliba onüktem yimjak nung memetetdaktsü tashi Sumi nungertemi agizüker mesüra magizüker ta meshii atatsü ta August 23, 2015 nü Sumi Hoho tongti tezülur Vihuto Asumi-i osangkakettem nung sangdongba tangatetba nung Sumi nungertem masetshii noktaka lir ta tanü senden nungsa bangjemtep.
NSCN (IM) mokdanga aliba agienba ajanga Sumi nungertemi tenangzüktep pusema nungiter ta mangatettsüla, ta Sumi Hoho sangdong nungsa shia lir.