Sumi tentettemi CNSA mapatong nungiter

Zunheboto, July 21 (TYO): Tanü Sumi nunger lokti tentet Sumi Hoho (Sumi nunger tentet tuluba), Sumi Kukami Hoho (Sumi GBs association) aser Sumi Totomi Hoho(Sumi women organization) tentettemi Central Nagaland Students’ Association (CNSA) nungiter ta sangdongba den külemi association mapatong ajak nung parnoki amaliteptsü aser temoatsü agütsür, ta sangdongogo.
Central Nagaland Students’ Association (CNSA)-i Lotha nunger tentettem den senden takok ngua aliba sülen Zunheboto town, Sumi Hoho Ki nunga senden mena liasü. Iba senden ya All Sumi Students’ Association (SKK)-i ayongzüka agi.
Iba senden nung Sumi Hoho lenirtemi, CNSA tentetba nükjidong aser teinyaktsütem indang tenüngsanga jembiba den külemi Association ajanga lokti nung temelenshi tajung bener arutsütsü imlar, ta metetdaktsü.
Sumi Hoho lenirtemisa Nagaland University, Lumami onük benoka Lumami nung aliba NU Headquarters ya education Centre ka akümtsü imlar aser iba asoshi bangdakpur den iba onük benoka jembiang, ta shiogo.
Iba senden tembangba sülen CNSA lenirtemi Government College, Zunheboto semdanga tesayurtem den shisa lemsatep kaogo.