Sunanda asüba ken o nung FBI-i Report agütsü

New Delhi, November 11 (Agencies): Congress lenir aser MP, Shashi Tharoor kinüngtsü, Sunanda Pushkar indang samples nung radiation level ji “standard safety norms” kübok lir, ta tanü Delhi Police-i ashiba den külemi parnoki FBI report-a metetdakja, ‘polonium poisoning’ ajanga la asü ta asübaji tai, ta shiogo.

Delhi Police Commissioner BS Bassi-i, Washington D.C. nung aliba laboratory nungi osangji kobi melii medical board nem agütsütsü, iba sülen ang iba ken o tulu atema maneni inyaka aotsü, ta ashi.

Ano külen police osang ajanga ashiba agi, iba ken o bushisüngdangba telok, Special Investigation Team (SIT)-i maneni asüngdangyatsü atema Pushkar kinüngbu Shashi Tharoor jaoktsüa akok.

SIT-isa court dang temelaba meshia taoba Union Minister Tharoor dak polygraph (yazü jembiba tendangba) agitsüa akok.

Tang tashi nung bushisüngdangertemi nisung trok dak polygraph tetendangba agiogo, aser parnok ajak ya iba ken o nung kuliser tongtibang nisungtem lir. Parnok rongnung Tharoor’er kidang yariteper Narayan Singh, gari anir Bajrangi aser par kibong tembar Sanjay Dewan nunger densema lir.

Iba ken o nung Tharoor danga asüngdangyaogo saka tang tashi nung pa dakbo Polygraph test agia mali.

Osangbenertem den jembidang Bassi-i, “Iba report ji nguogo ta ni angazükogo. FBI laboratory nung substance balala tendangogo. Iba report doctor temi shisadangba sülen iba ya ajanga temaitsü ka (la asüba kuli) agütsütsü,” ta ashi.

Samples nung radiation level dak sentakba tasüngdangba ka langzüdang Delhi Police Commissioner Bassi-i, “ibaji standard safety norms kübok lir aser iba tebushitetbaji post-mortem report den sentakepa alitsüla” ta ashi.

Osang ajanga angazükba agi, samples yokba sülen ita 9 shi lir kaket tapak 8 tashi nung aliba FBI report ji nguogo, aser iba report nungji küm ana tejaklen Sunanda asüba miim ji shisema lir.

AIIMS forensic tongti, Sudhir Gupta-i la asübaji miim ajanga lir ta shiogo.

“La asübaji miim ajanga lir ta tebushitetba lir,” ta Gupta-i ashi.