Sunanda asüba ken o nung SIT-i Tharoor dang asüngdangya

New Delhi, February 14 (Agencies): Honibarnü Delhi Police indang Special Investigation Team (SIT)-i Shashi Tharoor dang pa kinüngtsü Sunanda Pushkar asüba ken o nung ghonda pongu tashi asüngdangyaogo.
Asüngdangyaba mapang Congress MP Tharoor-i, pa kinüngtsü asüba nungji melung malemtsüsa kecha mali ta shiogo, ta CNN-IBN osang ka ajanga ashi.
Asüngdangyaba piyong Tharoor-i Sunanda asüba nungji melung malemtsüsa kecha mali ama paibo bilemer aser laji mozü achiba ajanga asü, ta ashi.
“Shashi Tharoor-i pa kinüngtsüji mozü achiba ajanga asü ama bilemer,” ta SIT osang ajanga ashi.
Pa kinüngtsüi achiba mozütem indanga pa dang asüngdanga liasü.
Tamalen Delhi Police Commissioner BS Bassi-i, Sunanda Pushkar asübaji alima yimya nung asüba masü ta jembia lir.
“La asübaji alima yimya ama masü aser ibaji tejangja. Tang tashi nung onoki bushisüngdangba aser kuli bendenba ajangabo, la asübaji alima yimya nung asüba ka masü,” ta Bassi-i ashi.
January 2015 nung Delhi Police-i Sunanda asüba dak sentakba nung nisung tepsetba ken o ka benokogo. Ano AIIMS medical board-ia la asübaji miim chisemba ajanga lir ta shiogo. 2014 küm January ita nung Sunanda ya New Delhi nung aliba five star hotel takdang ka nung sür lia angu.