Sunanda Pushkar miim ajanga asü: AIIMS

Sunanda PushkarNew Delhi, January 22 (Agencies): Taoba mapang Union Minister aser tang Congress MP, Shashi Tharoor kinüngtsü Sunanda Pushkar asüba ken o nung la indang samples tendangba sülen AIIMS medical board-i, la tebok nung Alprax mozü liasü, ta shiogo.

Ajisüaka Sunanda temang nung ajem tarak aliba dak sentakba nung medical board-i miim mozü amshi asütsü akok ta temulung melemi bilemba agizüker.

AIIMS medical board-i Delhi police dang ashiba agi, FBI report ajanga la temang nung lidocaine aliba osang jangjatsüogo.

Medical Board-isa, Sunanda temang nung syringe tarak aliba dak sentakba nung iba ken o bushisüngdangba telok Special Investigation team (SIT)-i, la dak ajem tutsütsüsa nisung kar nem temelaba agüja ali asü mali asü’ar jungjunga bushisüngdangtsüla, ta ashi.

“Iba ken o nung nisung asütsüsa akumbaji miim ajanga lir ta Medical Board-i tatembangsüa o bangjemogo,” ta parnokisa ashi.

“Alprex Tablets (mozü süngjang 27) indang terep tazüng aser FBI osang ajanga la tepok nung Alprax aliba kuli sayur. Iba mozüji tepa, temesen, tezüngjang anaprong tesadang shi nung, azü sample aser natzü den külemi yipten sü nung anguba ajanga Alprazolam mozü süngjang tali achiba ajanga asü ta kuli angur,” ta report nung zülua lir.

Board-isa, Alprax kwi achiba ajanga nisung asür, ta asübaji nisung-nisung dak keta lir, temang anema aliba dak keta lir aser Alprax achiba medical history, mapang kwi achir aser Alprax kwi achi, iba dakji keta lir. Mozü kwi achitsü’ar iba tetuyuba dak tali achiba ajanga mozüji miim kümdaktsür, ta ashi.

Medical Board-i osang agütsüba dak sentakba nung tanü Delhi Police Commissioner, B S Bassi-i jembitsü memelungi liasü ajisüaka pai, iba ken o bushisüngdangba maparen tembangba sülen osang ajakji lemsateptsü aser report ka okadak agüja lir, ta ashi.

Osangbenertem den jembidang pai, “Tang-tangbo ni kecha melemsateptettsü. Kodang bushisüngdangba maparen temdir onoki okadak report ka agütsütsü. Iba mapang nung onoki bushitetbatemji osangbenertem den lemsateptsü. Kobi melii iba ken o bushiba tembangtsü,” ta ashi.

Arishi küm 51 Sunanda ya January 17, 2014 aonung South Delhi nung aliba five-star hotel ka nung sür angu.

You must be logged in to post a comment Login