Sunanda soseta asütsüsa Shashi Tharoor-i inyaka lir: Delhi Police

New Delhi, Monupii/May 14 (Agencies): Congress lenir, Shashi Tharoor kinüngtsü, Sunanda Pushkar asüba ken o dak sendakba nung Tharoor-i la soseta asütsüsa inyaka lir, ta tanü Delhi police-i tai tongloktsü.
2014 küm Aenjeti/January 17 nü south Delhi nung aliba Leela Hotel nung Sunanda Pushkar tasümang angu, iba sülen küm pezü lir tang Delhi Police-i iba ken o nung la kinüngbu aser Congress MP, Shashi Tharoor nema tai tongloktsüogo.
Metropolitan Magistrate Dharmender Singh matsüngdang Patiala House court nung Delhi police-i chargesheet file asü. Police-i, iba ken o ya nisung tepsetba ken o masü saka soseta asüba ken o ka lir, aser la soseta asütsüsa Tharror-i inyaka lir ta tai tongloktsü
Iba dak sendakba nung Tharoor-i, iba chargesheet ji tamangtettsüsa masü, iba ken o bushisüngdangtsü atema Delhi police-i kechi tasasa amshi, ta asüngdang.
Paisa, pa nem tai tongloktsüba anema pai tokteptsü, ta shiogo.
Osang angazükba agi, Indian Penal Code (IPC) kübok section 306 aser 498A (soseta südaktsütsüsa inyakba aser kinüngtsü dang maochiba) nung ajemdaker Tharoor nem tai tongloktsü. Rongchii/April ita nung iba ken o bushir special investigation team-i Supreme Court dang, kanga junga bushisüngdangba sülen final report renemogo aser legal inyakyim sülen trial court nem agutsütsü, ta metetdakja liasü.