Suncity Club-i asayar telok balala ajuru

Kohima, May 07 (TYO): 9buba Open Basketball Tournament (OBT) nüngtem nung tanü Suncity Office, Kohima Village nung iba tournament nung tokteptsü tejangja alirtem aser tejangrartem den senden ka kaogo.
Suncity Club tir, Neilavonyü Rutsa-i ketdang süa aniba iba sentong nung telok 12 nungi arua shilem agi aser Technical Board nung Director, Medohu Rutsa-i technical tsütsü rasaa ashi. Iba asayamong ayongertemi temzüng aser ozüng yanglua aliba osang iba asayamong Co-convener, Medozhatuo Rutsa-i metetdaktsü.
Iba asayamong nung shilem aginür asoshi Suncity Club Office, P. Khel Kohima Village nungi form angutsü aser May 15 tashi nung form tem iba office tongtsütsüla. Iba asayamong asoshi ‘fixture’ ya May 20 nikongdang 1:00 ako nungi tenzüka Khuochiezie Local ground nung asayatsü.
State nung lanurtem sempet balala keta alir nem sapang lapoktsütsü asoshi NBA aser Suncity Club ajanga B-boying, beat boxer, BMX stunts, kentener aser tsüngsangertem-i Director of Entertainment Board den agüja aliba mobile No. 09856380426/08860054186 ajanga tongteprateptsü metetdaktsüogo.
Iba kasa asyamong nung chiyongtsü ayokba dokan aser hotel lapoktsü, ta Suncity Club nung ketdangsertemi sangdong ka nung ashi.