Sunday School Graduation

~ Lanu Atsongchanger.

Sunday School ta asüdang lanuwa bilemteter aser yamaji khen danga meyipa lua ozü tesayurtemi class kidang temolung O züngdangtsüba to züngdangnüa li ta menungraa arur. Sunday School nung angazükba lai o aser otsütem tanü tashi temulung nung lir. Yamaji ozü tsüraburi deobar shia Sunday School-i ajungshia yokba ni bilemteter.
Sunday School ta asüdang iba yabo tanur aser tsüraburtemi zübazübaa dang toktsür saka school ta asüdangbo tesayurang tetsübuba, tsüraburang tetsübuba ta tanurtemi school züngteper. Hau, school nungji asenok kaket shisatsü angazüker saka Sunday School nung yabo asen taküm nung Khristai agütsüba tekümtetji angutsüsa angazüker. Anungji school nung tsüraburi koda temulung agüja tesayur tajungtiba bushia tuition tashi agüja züngdaktsür, yamaji iba Sunday School nungya tsüraburi temulung agütsüdaktsüner. Nüngdakra Sunday School lesson atemaa tuition agütsü nung tanur ka atema koda jungla. Tanur ka tanela tekümtet ajangzüktetdaktsübaji tsürabur ka shilem nung Tsüngremer wadang tulutiba ka takok nguteter asütsü.
Sunday School Tuition ta asüdang asen atema orenji tasen ka saka iba ya Arogo nung Christian Education Deptt. kübok tongtibang mapatong ka asütsü südi ta bilemer.
Tanur kadi Sunday School nung ya Beginner 1st Year nungi Senior 3rd Year tashi azüngba nungji (Beg. I,II,III; Pri. I,II,III,; Inter. I,II,III; Senior I,II,III) küm 12/13 tashi tsüraburi ashi anga Arogo kübok kaketshir züngsem tajung ka ka ama zünga atur graduate asür. Ya atangji tsürabur aser Arogoi tanurtem dangji kangasa pelatsüba maparen ka lir. Kodang asenoki pa/la Sunday School züngtembaji jungjunga shisadangdir, pa/la taküm nung life stage ka tembanger asütsü aser yamaji pa/la nem iba Sunday School course tembangtetba atema tepela aser tetushi agütsütsüji kanga tongtipang ta bilemer.
Kodang iba course-ji tembanger, pai/lai tanaben ano Sunday School toagi onüaka joko tensa jagi bener marutsütsü. Anungji küm 12/13 tashi, tsürabur aser tesayur ashi anga taküm nung Khrista agizüker lia aotsü angazüktetbaji tepelatsü masü no? Anungji tanur shirnoki Senior 3rd Year course tashi agia takok angur, Arogoi pei sasep nung item graduates-tem nemji aküm aser tetushi agüja Sunday School Graduation sentong tajung yanglur agi nung koda?.
Iba tangatetba nung Mokokchung Compound Baptist Arogo (MCBA) nungbo Nov. 4, 2012 küm, World Sunday School Day amongdang aibelener ka mesüra mezüngsüa iba Sunday School Graduation sentong ayongzüka T. Mayang Pastor ajanga ABAM nungi yokba graduation degree certificate agüja liasü. Iba küm Arogo nung mapa tasen ka saka kanga dang mera keta iba SS graduation ya agiteta liasü. Iba sülen tasangkümji Ao arogo balala nung iba Sunday School Graduation agia aoba ngua kanga pelaa liogo aser yamaji Arogo kwinangkati iba Sunday School Graduation agir, maneni sentong tajungba yanglua amongtsü junger.
Anungji kokra World Sunday School Day nung ya Arogotem nung iba SS graduation ya agi nung kanga ajungtsü.