Sunday School koda tongtibang !

– P. Yanglu Lkr, Signal Basti, Dimapur.

(Maneni taoba adok nungi…)
Mezüng Samuel 1:27-28 nung Elkana aser kinungtsü Hanai tena nem Tsüngremi moatsüba jabaso Samuel sarasadema putir mapa nung yaritsü aser Tsüngrem o angazüdaktsütsü asoshi putir Elii den toktsü, pei kidang mapa meinyaki chiyongtsü tajung chiyonga lidaktsütsü tenati mebilem saka tanur asoshi putir mapa aser Tsüngrem o angazükbajisa tanur atema tongtipangba ta angatet. Tanur ka pei lenmangi aotsü sayutetang ta lai nung ashiba aser Tsüngrem tsübubaji shisatsü tetenzük. Samueli kibuba tsübua putir tenzük, tesülen pa Israel ajak madak obendanger yimsüsür aküm, tatishitsü koda tulu?
Akhi mapang SS mali asü, saka putir aser ainker ajang dang Tsüngrem o aser alima shisatsü angazüka liasü, anungji tsürabur-temi pei chir putir nusür ainkar den yuja parnok ajanga angazük ta angateter. Tanü tsüraburtem karibo tanur tashi kanga shija bilemtsüba ajanga tensa mapang kar nungbo pei chirtem aser kibong akoksatsüsa akümba ajiteter, SS-i aotsü lenmang talang, lemang majung, tsüngsang majung, kanga mokong, kanga tatsük, anü tali apur, tangari merenshitsü ta tatemtsü aika shia tanurtem SS-i aotsü nokdanger, saka nisung ka tetemsü akümtsü aika shia tanurtem SS-i aotsü nokdanger, saka nisung ka tetemsü akümtsü asoshi tajung-majung, timtem, tepela ajak ajangshia aotsüla, nisungtem asoshi angazüktsü/agizüktsü mapang ka lir, aji kar asoshi SS, tenla ki, youth camp etc, saka kar asoshibo hospital, jail aser lendong mapang asütsüa akok, kar asoshibo item ajak majurui samatsüa akok, anungji asen chirtem lendong aser timtem mapang angazüker masütsü asoshi mapang tajung nung parnok kechisarina nung azüoktsüla. Tang teindak mapang nung tajung, majung ajak yakta angazüker, kechiaser iba (stage) mapang parnok jangrapangra angazükner. Tanurtem küm 10 nungi 18 tashi nung kechi angazük, ajizüka yimya subar aji agi taküm piyong len anitsü. Shin o ka nung “Strike the iron while it is hot” yin junga merema rur alidang akoshia memetongra mokonga kümerbo metonga mekümdaktsütet ama, tang mapang parnok meyanglutetra asüngbo menuadoktsü, anungji shia aliba küm tasazük nung ya asen chirtem Tsüngrem dang sarasadema azüoka tajungtiba kümdaktsütsü tsürabur shia khuret südi.
T. kunem 6:4-9 nu tashi aser tanüla ajak agi Tsüngrem meimang, itemji nu chir dang nendaka sayuang, mena alidang, jajadang, sakdang, oda mapang ajak nung maneni Tsüngrem o shiang, aji nu teka nung alenlokang ta shia lir, saka tanü tsürabur aika tanüla nung sümanga mejanga oa lir. Yona 1:6, A. shin 6:6-9 azümasen na mejangba nungi saktsü mapang tongogo, nu jabaso-jalatem tesamar dang lir koda ?
Kodang Samuel putir nungi shisatsü peria angazüka Tsüngrem o nung mongin aküm, putir chirtem masü Israel madak obendanger küm aser Israel pur tim lenmangi ani, pa mapang alima rara aika akok ta otzü nung angur. Tanü asen putu nung alima rara masü saka mojing den raratsü tanülar tongpang tulu lir. Mathi 20:16-20 Yisui ashi nenok alima ajaki oa meimchir ajak kü nütsüng kümdakjang, alima ajakleni yisu osang bener aotsü mongdang aser arogo nukchidong lir, süra shir aser shiba aotsü ? Asen jabaso aser jala-tem aotsüla, saka asen kidang kodanga tekülem magir, chirnur dang Tsüngrem o meshidang SS-i aotsü majungshi süra parnoki Tsüngremer sentong atalokdaktsütsü asü? Masü ajibo tamakoktsü, süra asen chirtem tamasa kong angazüktsü? Koda taküm yanglutsü? Ensem koba nung yim mashi ka agi oset tajung yanglua nüngdak ajak amshi, SS-ji taküm tabensa küm yangludak ensemji lir, SS nung lai o tatongi angazüka nisung ka tanüla aser shisatsü nung moluteter/renemteter ta asenoki kuli angur. T. Mapa 8:31 tashi temeteter aser tanishir Ethopia nungbai Philip dang ashi kari ku dang rateta meshira ni koda sür angatettsü? Tashi temetetsangia Tsüngrem o-ji kari rateta meshira mangatetsü ta ashiba lai nungji angur. Süra asen chirtem dang tsüraburia mashi SS-ia meyok ta süra kong? Kodang? Parnoki angazüktsü? Aser asen kibongi Tsüngremer sentong koda ataloktsütsü? Shisadangang.
Anungji Tsüngrem nükjidong aser sentong tulu atalokdatsütsü asoshi arogoi SS-tsütsü tali temulong agüja ketdang asütsüla aser tsüraburtemia chinur SS-i methitemi yoka tanüla aser shisatsü nung Samuel ama renemtsütsüji tsürabur teinyaktsü mapa ta angatetra Tsüngremer sentong tulu asen kibong ajanga atalokdaktsütsü. Arogo nung SS-ji missionary Ensem ta asüba sungjang chichibaji asen jabaso-jalatem taküm yanglubaji asütsü ta iba ocet ajanga Tir Yimyim osang azünger tem ayongzüker.