Süngdong temtetba Drone ka yangluogo

June 26, 2017 (Agencies): Australia nunger engineer kati deforestation tebilemtsü den raratsü asoshi küm shia süngdong billion kaka temtetba drone ka sayaogo.
Susan Graham-i Deobarnü lai yanglutetba drone ka sayaa liasü. Iba drong ajanga süngdong junga meitettsüba alinük tendangteter aser iba sülen süngjanga tema doktsür, ta osanga ka ajanga metetdaktsü.
UN data ajanga ashiba agi, alima nung carbon adokdaktsüba ya shilem 17 bo deforestation ajanga lir koba transportation industry nungi adokdaktsüba dang nungi timba lir. Alima renloka aoba ajanga küm shia süngdong billion 15 dak tali samara.
Graham-i ashiba agi, iba drone ajanga taoba mapangtem nung süngdong metemtetba tesem longren amala nunga temtettsü. “Asenoki küm shia süngdong billion 9 shi atemer saka iba ajanga ano süngdong billion 6 shibo takoksa alur. Süngdong temshiba maparen ya kanga meyilongi dang inyaker,” ta Graham-i osangbenertem dang ashi.
La BioCarbon Engineering telok ka den inyakdar aser iba telok nung bushisüngdangertem alima ajunga nungi sentepa lir. Parnoki yanglutetba drone ajanga teka agi süngdong atemba dang nungi ter sü agi tekaraba temtettsü aser 20 sü agi senotsü, mapang tajemba indoktsü.
BioCarbon CEO aser taoba mapang NAS engineer Lauren Fletcher-i ashiba agi, iba drone tasenba yagi mokor aliba metsüjang khen yongi 150 benteter.
“Onoki iba drone ajanga second shia süngdong kaka temteter aser aji asadangra operator anati anogo ka nung süngtong 100,000 shi temtettsü. Iba amala mesükba team 60-ibo küm ka nung süngdong billion ka temtettsü,” ta Fletcher-i ashi.
Iba drone ya New South Wales (NSW) nung taoba mapang nung mine aliba tesem ka nung tendangogo. Maneni süngdong metsü tesem tuluba ka nung peroktsü asoshi tashi aliba drone tanabuba parnoki yangluogo.