Süngkomen aser Alempang arogoi yaria Mokokchung Dist jail nung metsümeshidak yanglutsü

Mokokchung, April 4 (TYO): Swachh Bharat Mission (SBM) Mokokchung-i achayanga Alempang aser Süngkomen Baptist Arogoi yaria Mokokchung District Jail nung kanga nüngdakba water supply aser metsümeshidak tajung ka yanglutsüogo.
Ibaji Mungulbarnü Swachh Bharat Mission, Brand Ambassador Supongmeren Jamiri lapoktsü.
Sentong tongmelang ka District Jail nung agidang, tetushi tesemdanger Supongmereni Süngkomen aser Alempang Baptist Arogo nati iba ama tejakleni arua mission mapa tajung inyakba asoshi pelaba lemsatep.
Paisa Swachh Bharat nükjidong kar lemsatepba den tepuokdak alirtem dang merükmejua alitsü asoshi ajungshia liasü.
“Tepuokdak alirtem aika nisung tajung akümba otsü lir, anungji, nenok ya nüngdak maliba nisung ka amai nenoki mebilemtsüla, saka yangi temelenshiba ngur lokti asoshi khuret abener kaka akümtsü merangtsüla”, ta paisa ashi.
“Asenoki dang mulungteterbo nisung ya tajungba melenshiteter, anungji, teimla mesamatsüla”, ta paisa shisem.
Iba ama arogoi jail nung metsümeshidak yanglutsüba ya department asoshi ibai mezüngbuba otsü tasen ka asütsü, ta District Jail Superintendent Zuchamo Lotha-i tetenlar aser achayanger SBM (Mokokchung) dang pelaba olen ka metetdaktsü.
Iba sentong nung SBM (Mokokchung) Chairman M.B Longkumer menden liasü. Kasa sentong nung Mokokchung DC & Member Secretary DLRMC (SBM), Sushil Kumar Patel (IAS), Sungkomen Baptist Arogo pastor Rev. O. Yashi, Jail Chaplin Moasosang aser tepuokdak alir nungi nisung kati shilem agi.
Iba mapa meshiteta Alempang Baptist Arogo Assoc. Pastor T. Akümi sarasadem.