Sungkomen Ward Temerükba Ward

– Impo Imsong, Salangtem Ward.

Mokokchung town ya Naga nunger rangbeni meraketa ranglokba topur tajung temeruktiba tesem ka ta züngshir. Mokokchung Town nung lidanger aoertemi Mokokchung menungra jembiba aser züluba asenoki ajangshia arur. Yamaji tang telidak nübortem ya karbo mesüra asen kin masübatembo timba ka Mokokchung Town ya toktsür danga tesemtem nung lia aotsü. Idangji asen Mokokchung Town bilemteta menungratsüsa aser tangari nükshitsüsa asenokia kechi tashi ka inyakteter (?) ta asübaji senso shia teinyaktsü shilem lir ta angateter. Asen tsüraburtemi meranga inyakba ajanga kechisarena nung tenüng tajung doktsüba meraket mesamadaktsütsü aser ano taliang bendenloktsü asoshi yimsüsüba pangdak amenertem nungi tenzüker arogo aser mundang lenirtem, molungtet teloktem aser nütsüng nübor ajaki shisa agütsütepa meranga inyaktsüla.
Naga lima yimsoshi tenzükba otsüji meyipa reprangra, kechisarena nung Aoer Khunendong/mongjen Mokokchung town ji Naga nunger rongnung temapur aser tongtipangsa asen meketa aliba Naga kintem asoshi tanüdangtsü ka ama tanü tashi meraba Soyimji Mokokchung Town aser yangji aliba nübortem. Yamaji asen tsüraburtemi yangerteta toktsüba yong, Naga kintem rongnung yayim ajak nung temapurtem sotetpongtetdak lanu-ain nadi nümadangdanga jembir, jembiba aser tenüngsangji dang masü, saka shitakba tebur ajungji sayutettsüji asen nüburtem mapa.
Asen konang küma ‘Temerüktiba’ ta jembidang aser angashidang aiben asenoki yimdong dang yimdangi arua jembir. Saka shitakba merükmejuji kima-yimdong (tema tereprangtsü) nung jana-ona merükba dang nungi asen temeket tajichi-tabelen aser sünglanglen kimalen koma ayur, kilong tip tema ayuba, kisüjensüba yimyatem aser senso nüburtem tangar den awashi yimya ajak sendaka lir. Ano shidi süra, na aliba anasa kilentsü koma sadema merüka ayur, nür kima ajanga aodang süisüpongertem lenmang nung sadema senzütetba, kisüjensüba mapang lenmang nung süisüponger nem timtem magütsütsüsa süngküm tongnü ayuba, asen gari anena ayuba ajanga senzüsenpongertem nem timtem magütsüsa aser asen ki-o-jen süiba lenmangtem nung tawa sadema doktsübaji merükmeju nung shilem tulutiba ka asütsü.
Sungkomen ward-i 2015 küm “The year of Sanitation” ta agüja sangdong aser par meraket ward yimden yimsüsür lenisüba kübok küm piyong ward sanger ajaki shingaia shinga daka meimlatepi pei ataba mapa amato kima yimdong aser temeket merükmejua aruogo.Mokokchung nübortemi dang masü ainer süisüpongertemia par ward ajanga süidang kima yimdong ajak tobur junga merüka ayuba nguogo. Aji oda 24th December 2015 anepdang Imkongmeren Sports Complex nung “Mokokchung Town Christmas Cake Race” den Mokokchung Town kümteter küm 125 ajungba benjungmong nüngtem nung Mokokchung Municipal Council (MMC) ajanga 2015 küm tepiyong repranga aruba Town nung ward 18 rongnungi ‘Temerüktiba ward’ senpet Süngkomen ward nem agütsüogo. Parnok anguba senpet yabo par mapa alangpo masütsü akok, oda senpetji kotika südir süang saka iba tenüng tajung yagi nübortem molung nung teti ajungshitsü aser iba sentong tajung ya ajanga nübortem ajungmesoa Mokokchung Town tebur tajungba aser temerükba shisang-shisanga akümtsü ta amanger.
Atangji, sempetji tetokteper ajakibo mangutsü, saka nübortemi sempet dak dang merangloki asen temeket merüka ayuba tenüng tajung anguba dang masü, saka asen temang anema alir ta angateti aser tarutsü nungbo iba ya ajanga alimai tejangjaba nung Mokokchung Town ya meteta rongsenketsüng nunga asen nübor asoshi tarulen lenmang tongtipangtiba ka akümtsü nükla yur inyakdi.
Süngkomen ward-i mapa tajung inyakteta sayuba asoshi par nem Mokokchung Town nübortemi tenüngsang tulu agütsür. Mapa tajung inyaktsü ajungshia MMC nung ketdangsürtemi anibelem mesasai asalendong tajung asateta inyakba asoshi MMC nema tenüngsang agütsür. Ano wadang aika asen jakdang kar, itemjia pangdakpur/ketdangsürtemi tarutsü anogotem nung reprangeta ajungshiteptsü yimlar. Kechi mapa südir süaka, külem town ka nung alir ward kati inyaktetra tanüngba ward temia inyaktettsü ta amanga iba ocet ya zülur.