Süngkomen yimteni alima aser libajen merükmejua ayutsü ayonger

Mokokchung, October 04 : ‘Merükmejuba Küm’ omen nung ajemdaker Süngkomen Ward yimteni 2015 küm maparen balala inyaka aruba den repsema Mokokchung town Quasqui Centennial nüngtem Ward yimten lenirtemi October 3, 2015 anogo Ward telongtet nung aliba lenmang aser kilentzü merüka Dust bin/reeling/wall aser waiting shed nung ‘white wash’ aoba den lenmang tepiyong janaona oktoka nübutoka mungogo.
Merükmejuba ajanga alima aser libajen nem tajangzük bener arutsübatem tejangjaba nung angatetdaktsütsü nükjidong nung ajemdaker Süngkomen Ward yimteni sentongren tenzüka Er. Yanger Pongen, EE PHED Mokokchung ajanga March 26, 2015 anogo “The Year of Sanitation” sentong lapoktsü.
Merükmejuba Küm omen nung ajemdaker Ward yimten ajanga PHED den longjemer Ward sanger kilen shia nem janaona sepdena bendener indoktsü atema yimsaa aotsü akokba polythene mica (bio degradable polythene mica) 2000 lemtsü.
Janaona agi kima yimtong menenmechiba nungi kümzüka ayutsü nükjidong nung Ward sanger kilen shia nem Dust Bin (30 litres) lemtsü, koba Bendanglila, ADC & Administrator, MMC ajanga April 25, 2015 anogo tenzüktsü. May 30, 2015 anogo Süngkomen ward telongtet nung mesangdaka aliba NH-2 lenmang nung kilentsü/anentsü yadoka merüktet.
World Environment Day 2015 anogo Forest Department, Mokokchung teyari agia Yimteni kilen shia süngdong lemtsüba sentong Ranger Moa ajanga tenzüktsü. June 7, 2015 anogo Süngkomen sanger atema Common Toilet unit ka PHED, Mokokchung ajanga agütsüba Yimteni anepalua inyaka liasü.
Ward yimteni asameyangba maparen balala takok ngua inyaktetba ya nüburtem aser department teyaritep ajanga lir ta Süngkomen Ward yimten chairman Lima Kichu aser secretary Yangerjungba nati olen ka nung ashiba den teyariteper ajak dang pelaba lemsatep.