Süngkotenem Angling Fest tembangogo

Mopungchuket (Mokokchung), Luroi/August 27 (TYO): Mokokchung district nung küm shia ayonga agiba Süngkotenem Angling Festival Luroi/August 20, 2018 nü tenzüka liasü aser tanü tembanga Mopungchuket nungi Aridong-i Biggest Catch Award angu.
Angling festival dak sendakba nung Süngkotenem Biggest Catch competition Luroi/August 20 nü-a agi aser iba anogo nung Mokokchung town nungi Nungshimar-i ango seret 0.550 pua takok angu.
Luroi/August 23 nü Mopungchuket nungi Opangkokba-i ‘carp’ ngo seret 1.970 apu aser ibaji ajanga Season’s Biggest Catch Award angutsü südi ta bilema liasü, ajisüaka Mopungchuket nungisa Sentinok-i nikongdang 2:15 ako nung ango seret 2.995 apuba ajanga Opangkokba ajatet, ajisüaka minute 45 shi lir Aridong-i ‘bighead carp’ ngo seret 3.655 apu.
Süngkotenem Angling Festival ya kümshia Mopungchuket Community Tourism Society-i ayongzüka akar, aser iba mapang nung Mokokchung district tesem balala nungi tejangrar aika adenshia Süngkotenem awatsüng nung iba sentong nung shilem agir.