Süngkotenem Angling Festival tenzükogo

Süngkotenem Angling Competition 2016 takokertemi tayongertem aser Anglers Association Mokokchung District züngsemtem den külemi agiba noksa angur.

Dimapur, August 14 (TYO) : August 13, 2016 nungi Süngkotenem Lake, Mopungchuket nung Süngkotenem Angling Festival tenzükogo aser iba sentong ya August 27, 2016 tashi agitsü.
Yashi ango tulutiba mesüba tetoktepba agiba nung nisung aikati shilem agi aser Süngkotenem Angling Competition 2016 nung Mokokchung nungi Bendangmangyang-i mezüngbuba jenjang takok angu.
Bendangmangyang-i ango seret 4.80 ka mesütetba ajanga mezüngbuba jenjang takok angu, aser tanabuba jenjang nung Tsuwanungsang-i ango seret 1.30 ka apuba atema angu. Ano, tasembuba jenjang nunga Bendangmangyang-isa takok ngua liasü.
Tawa tasen tentetba Anglers Association Mokokchung District, President, Er. Toshikaba-i takoker nem sempet aser kulikakettem lema agütsü.
Süngkotenem Angling Festival ya Mopungchuket Community Tourism Society ajanga ayongzüker.