Süngkotenem beat contest Dec. 29, 2016 nü alitsü

MALT Süngkotenem beat contest ayongertem Black & White restaurant Mokokchung nung osangbener senden ka ayonga akaba sülen tangokba noksa nung angur.

Mokokchung,  Nov. 03, (TYO): Süngkotenem benjong den külemi Mopungchuket Ait Laishir Telungjem (MALT)-i ayongzüka MALT Süngkotenem Beat Contest – “Clash of the bands 2016” ta sür band-tem rongnung kenten tetoktepba sentong ka ayongzüka lir.
Taküm iba Süngkotenem benjongji December 28 & 29 nü Mopungchuket yimdak amungtsü asoshi yimertem mazüngi renemdar. Dec 28 nüji culture carnival ta sür sobaliba sentong temeja ka alitsü aser December 29 nüji Beat Contest sentongji alitsü, ta tayongertemi yangi Black & White Restaurant Mokokchung nung osangbener senden ka nung metetdaktsü.
Iba beat contest ya Mokokchung district nungbo tulutiba ka asütsü. Iba tetoktepba nung ya band mashi kati shilem agitettsü lapoka yutsür (open to all). Iba kenten sentong ya talisa tang atua alir musician-tem asoshi sempet sayutsü sabang tulu rongnung ka asütsü, ta parnokisa ashi.
Iba kenten tetoktepba ya kentenmenü luyim tsütsü jenjang ajungkettsütsü merangba den rali walirtem puadaktsütsü nükjidong yur ayongzüker aser ibai sorkar nungi teyari kecha makai yimer sasep nung achayanga ayongerba lir, ta parnokisa metetdaktsü.
Iba tetoktepba nung takoker nem senpet ajak senteper (total prize) sen 1.20 lakhs agütsütsü. Tematiba takoker asem (1st, 2nd & 3rd) shimtsü. Iba den ano nija sempet; Best Vocalist, Best Guitarist, Best Bassist, Best Drumer  aser Best Original Composition (ken tajungtiba mejemer) ta shimtsü sentong aliba parnokisa lemsatep.
Tejangrar band-temi item dokan-tem nungi form shia sen 300/- agi agizüktsü akok; Mokokchung nung US dollar Store (police point anasa), Kohima nung Sports Inventory Centre (Opp. Indoor Stadium) aser Dimapur nung Popular Sports Store, Kuda Phezou Complex (Kohima Road). Iba form denji band shiai registration fee sen 2000/- denner November 15, 2016 tashi nung agütsüseptsüla. Shir band screening round nung shimdokdir parnok nemji registration fee 2000/-ji meyiptsütsü, ta tayongertemisa ashi.
Iba tetoktepba nung shilem agir band shiai Screening Round atema demo track/record kaka (original/composition)-ji tayonger dangi Nov 25, 2016 tashi nungbo tongtsütsüla. Iba demo nungji ajemdaker tedendangertemi band tajungtiba 12 shimtsü aser item band 12 rongnung Dec 29 anepdang Live Audition ka alitsü aser iba nungi band 7 final round atema shimtsü. Final round-ji Dec 29 aonung 5:00 ako nungi tenzüktsü, ta parnokisa temetettsü kar shisem.
Anogo ananü benjong aliba mapangji chiyungtsü tapu balala ayokba süki (food stall) balala lapoktsü, teptsü atepdak (tattoo stall), Zip-lining, nüngo oset balala ayokba aser ano aika lapoktsü, anungji, iba benjong nung ajak pelashishia jaoker, ta tayongertemisa ayongzük.
Iba beat contest dak sentakba nung band kari danga osang tejangja metetnüa lira, iba mobile number 9856217157 (Bendangtemsü Ozüküm) nung tongtepratsü akok.
Mopungchuket yim ya raliwalir/meta penzür aruba yim tajung ka lir. Yangji kazüdak tesem aser otsüsütsü aketba nüngo tapu balala aika angutsü. Iba yim ya Mokokchung town nungi kilometer 14 shi pilar lir. Nenoki iba yim indang tali tejangjaba metetnüra www.facebook/mopungchuket ajanga reprangtettsü akok.