Süngo ajemba agi chiyungba meküptokteter

~ S. T. Yapang. Lkr. Kohima.

India nung süngo ayoker kati o tanang aika jembia nübur nem süngo alia jemdaktsütsü akok, ajisüaka Delhi aser Bihar nungeribo süngo kija agi chi chiyung meküptoker ta ni amanger.
Yamaji nütsüng nübur asoshia o kija den menüngdakba ozüng nung dang temulung agütsütsü agibo o kangara makaaka alima tesünep nung lokti tentet aser tamangba yimsü ajak kasa benshiba yimden telokji (political party-ji) tajungba.
Tanü lima nung süngo ayoker aika lir, ajisüaka ibaji ajemba kija agi chi chiyongba meküptoktettsü, süngo ayoker jagi o tanang jembia mesüzüktsü akok, idangji shisa makar jenti nonga aotsü, saka chi chiyungba amabo mesütettsü asünungji nüburtemi ibaji jemer ano chia chiyungtsü meyiptsüsa akümtsü.
Iba amala süngo ayoktsü sentong atongba mesüka linük nung tamangba yimsü nung dang temulung agütsütsü agibo Lok Sabha election nung kanga sashia jembia nangzükbatem nübur asoshi inyaktsü kanga tongtibang, item rongnung ‘black money’ (tax magütsüi tanga lima nung miima yua aliba sen) ya ka lir.
Kechisütsü sensaker asoshi maparen jenti inyaka mesüra asalentong atongdang tekolok mangmanga amungtsü? Tatsütiba agi election nung ‘black money’ bener arutsü nangzükba ama bener aru tajungba süla; koba India nunger nütsüng jenti süaka tilaba nungi tuluba tashi nisung shia sen lakh 15 atatsü akok. Saka election nung jembiba o tem to ajak süngo ayoktsüba sentong nung nübur mesüzükba ama dang süra küm pungo tema arudang nüburi metettsü aser vote agi ashitsü “süngoji nüngdak, saka süngo ajemba kija agi chi chiyungba meküptokteter.” Anungji linük nung lenirtem shisatsü ulushitsüla, aser nübur tesünep aser yimchiyimjung nung lidaktsütsüsa tebang agi masü mapa agi inyaktsüla.