Süngolu nung mapa inyaker junga lir: ULFA (I)

Guwahati, October 23 (Agencies): Shankar Tea Estate nung mapa inyaker ka pur aoba junga dang lir ta ULFA (I)-i metetdaktsüogo.
ULFA (I) züngsem ta ser nisung kati Gaurang Deb’er jala Priyanka Deb dangi phone asü aser tebu junga dang lir ta ashi.
“ULFA (I) züngsem kati tanü kü dang phone ajanga kübo parnok ket nung junga dang lir ta ashi” ta Priyanka-i osangbener dang ashi.
Shankar tea estate factory nung head fitter Deb ya October 11 nü ULFA (I) telungpurtem ta temulung melemi bilemertemi pur ao.
Police-i security forces den yaritepa Assam-Arunachal Pradesh nung bushiyonga aruaka Deb menguteter.
Deb’er jala Priyanka-i tebu pur aoba atema Shankar Tea Estate ketdangsertem dak tai tongloktsür.
“Shankar kibur Sudhir Kumar Lohia-i kübo indang timtem atema mebilemtsür. Pai pa kümzüktsü atema kecha meinyaker” ta lai ashi.
ULFA (I)-i Shankar tea estate ketdangsertem dang Rs 50 million meshir ta angazüker saka parnoki sen agütsütsü memulunger.
Külen, Shankar tea estate ketdangsertemi ashiba agi parnok dangi ULFA (I) nungi sen meshiba shidi kecha maru.
Shankar Tea Estate kiburji Kolkata nung amenoka aliba Sankar Tea Co Pvt Ltd. lir.